Сымнан тұрмыстық химияға дейін: Қарағанды облысының өңдеуші өнеркәсібі 10 айда 6,2%-ға өсті
Қарағанды облысында биыл он айда өңдеуші өнеркәсіптің тұрақты өсуі байқалады — плюс 6,2%. Бұл көрсеткіштің астарында жаңа өндірістердің іске қосылуы, жабдықтарды жаңғырту және жүздеген жұмыс орны тұр.
Облыстың кәсіпкерлік және өнеркәсіп басқармасы басшысының орынбасары Әлібек Молдакәрімовтың айтуынша, кәсіпорындар тұрақты жұмыс жүргізіп жатыр.
Осындай орнықты өсімнің көрнекі мысалдарының бірі — легирленбеген болаттан сым және болат арқандар шығаратын Kaz-metiz компаниясы. Зауыт индустрияландыру бағдарламасы аясында іске қосылған және Орталық Азияда баламасы жоқ. Оның жұмысы импортқа тәуелділікті едәуір төмендетуге мүмкіндік берді, ал өнім Ресейге, Өзбекстанға, Қырғызстанға және Беларуське экспортталады. Клиенттердің қатарында тау-металлургия, құрылыс, энергетика, теміржол және мұнай-газ салаларының ірі компаниялары бар.
Өнімнің жылдық көлемін 5 мың тоннадан бастаған кәсіпорын бүгінде 30 мың тоннаға жетті. 2023 жылы мұнда қуатты арттыру және жабдықтарды жаңғырту бойынша бес жылдық бағдарлама басталды.
Бағдарлама аяқталғаннан кейін өндіріс көлемі 50 мың тоннаға дейін өседі, ал штат 63 қызметкерге ұлғаяды. Биыл зауытта жаңа цех салынып, іске қосылды.
— Онда сымды термиялық өңдеу желісі орналастырылған. Бұл — метиз өнімдерін шығарудағы ең негізгі технологиялық кезең. Термиялық өңдеудің арқасында сымның сапалық сипаттамалары жақсарады, беріктігі артады, сонымен бірге икемділігі сақталады, — деп түсіндірді Kaz-metiz компаниясының директоры Дмитрий Малахов.
Өңірлік өнеркәсіпте шағын бизнес те өз позициясын нығайтып келеді.
WEC Trade компаниясы экологиялық тұрмыстық химия өндіреді — ассортиментте тазалыққа және кір жууға арналған 80-нен астам өнім бар. Кәсіпорын облыс индустриясының шамамен 5%-ын құрайтын химия өнеркәсібі сегментінде жұмыс істейді.
Филиалдары төрт қалада орналасқан, ел бойынша кең көтерме серіктестер желісі бар, ал өнім маркетплейстерге шығарылып, ТМД нарығына жөнелтіледі. Қазір компания Грузияға жөнелтілетін тапсырысты дайындап жатыр.
Штатта шамамен 50 қызметкер бар, команда өсіп келеді.
— Біз штатпен қатар өндіріс желісін де кеңейтіп жатырмыз. Ірі супермаркет желілерінің сөрелеріне шығу және Қазақстанның тағы бірнеше қаласын қамту үшін жаңа желі сатып алғымыз келеді. Бізде штаттық технологтар бар, сондай-ақ ассортиментті ұлғайту үшін танымал брендтерді әзірлеген мамандармен серіктестік орнатқанбыз. Біздің шағын кәсіпорын болуымыздың артықшылығы — технологияларды тез өзгертіп, жаңаға көшу мүмкіндігі, әрі бұл бізге үлкен шығын әкелмейді, — дейді компанияның маркетологы Дина Бедельбаева.
WEC Trade тұтынушылардың қажеттіліктерін зерттеп, өнім желісін нарыққа бейімдейді.
Өнім сапасы республикалық деңгейде де жоғары бағаланды: кәсіпорын «Қазақстанның үздік тауары» байқауында «Халыққа арналған үздік тауарлар» номинациясының жеңімпазы атанды.
Мемлекеттік қолдау мен даму институттарының жұмысының арқасында өңірдегі ШОБ субъектілерінің саны 102 мыңға жетті.
Фото: Александр Марченко