«Террикон алқабында» жылдың соңғы хакатоны өтеді

Қарағандыдағы «Террикон алқабы» IT-hub жылды қорытындылайтын соңғы хакатон өткізеді. Іс-шараға жаңадан бастап жүрген және тәжірибелі әзірлеушілер, IT мамандықтарының студенттері, тестілеушілер мен веб-дизайнерлер қатыса алады. Бұл – командалар үшін өз жобаларын ұсынып, ақшалай жүлде жеңіп алу мүмкіндігі.

PromTechHackathon 5–7 желтоқсан күндері өтеді. Қатысушыларға екі бағыт бойынша тапсырма ұсынылады:

– өнеркәсіптік диагностикаға арналған мониторинг жүйесі мен деректер базасын құру;

– су ресурстары мен гидротехникалық құрылыстарды талдайтын жасанды интеллект платформасын әзірлеу.

Жүлде қоры – 1 млн теңге.

Формат: офлайн/онлайн.

Ұйымдастырушылар іс-шараның маңызын атап өтті:

«PromTechHackathon – сенің мүмкіндігің! Үш күн ішінде әр қатысушы өз стилін, жұмыс тәсілін және көзқарасын көрсете алады. Сенің прототипіңді шақырылған сарапшылар мен компаниялар бағалап, ондаған IT-мамандар арасынан шын мәнінде ерекшеленуге жол ашады», – делінген ұйымдастырушылардың хабарламасында.

Тіркелу мына сілтеме арқылы жүргізіледі: terricon.kz.

Хакатон Қарағанды облысының ақпараттандыру, мемлекеттік қызметтер көрсету және архивтер басқармасының қолдауымен өтеді.

IT-hub «Террикон алқабы» мекенжайы: Алалыкин көшесі, 12.