Қарағандыға Астанадан инклюзивті театр келеді

Қарағандыға алғаш рет Qazaq Inclusive Theatre ұжымы келмек. Бұл труппа жақында ғана елордада, «Kozimnin Qarasi» атты Қазақстанның мүгедектер қоғамдық бірлестігі жанынан құрылған. 4 желтоқсанда С. Сейфуллин атындағы қазақ драма театрының сахнасында олар премьералық қойылымын – Жүзбай Серіктің «Өмір-ғайып» романының желісімен жазылған «Жоламан» музыкалық драмасын көрерменге ұсынады.

Қойылым қоғамдағы маңызды мәселелерді – тастанды балалардың тағдырын, ата-ананың жауапкершілігін және отбасы құндылықтарының маңызын көтереді. Драма ерекше жаратылған жанның өмірі туралы сыр шертеді: ол көру қабілетінен айырылса да, жүз баланы өз қамқорлығына алған.

Көрермендер өнердің адамдарды қалай біріктіретінін өз көзімен көре алады. Инклюзивті театрда кәсіби әртістермен бірге ерекше қажеттіліктері бар 20-дан астам актер жұмыс істейді.