Қарағанды облысының тұрақтандыру қоры жаңа өніммен толықтырылады

Қарағанды облысында егін орағы қарқын алып, қорытындысына жақындап қалды. Бүгінгі күнге дейін 780 мың тонна астық бастырылып, 260 мың тонна картоп пен 18 мың тонна көкөніс жиналды. Қазірдің өзінде маусымаралық кезеңде бағаны ұстап тұру үшін көкөніс өнімдері тұрақтандыру қорына жөнелтіле бастады. Бұл туралы облыстық ауыл шаруашылығы басқармасының басшысы Әнуар Түлібеков аппараттық жиында мәлімдеді.

Алдын ала болжамға сәйкес, биыл облыстың диқандары шамамен 1 миллион тонна астық, 373 мың тонна картоп және 75,5 мың тонна көкөніс жинайды деп күтілуде.

Әнуар Түлібековтің айтуынша, жаңа өнім есебінен өңірлік тұрақтандыру қоры жасақталуда. «Сарыарқа» әлеуметтік-кәсіпкерлік корпорациясы 11 700 тонна картоппен қатар, 7 мың тоннадан астам сәбіз, пияз және қырыққабатты сатып алу жөнінде келісімшарт жасаған.

Сонымен қатар, келесі көктемгі егіске дайындық жүріп жатыр: тұқым қоры жасақталып, олардың сапасын анықтау үшін зертханалық сараптамаға тапсырылуда.

Биылғы ауа райының ерекшелігіне байланысты жиналған астықты кептіру қажеттілігі туындап отыр. Қазіргі таңда облыс аумағында 53 астық кептіргіш жұмыс істейді. Дизель отыны бөлінген, ал арзандатылған газ бөлу мәселесі әлі шешіліп жатыр.

Аппараттық жиында алдыңғы қатарлы ауыл шаруашылығы кәсіпорындарының басшылары да сөз сөйлеп, мемлекет тарапынан көрсетіліп отырған қолдаудың маңыздылығын атап өтті. Айтуларынша, субсидиялардың уақытылы берілуі шаруашылықтарға тұрақты жұмыс істеуге әрі өндірісті дамытуға жол ашуда.

Облыс әкімі Ермағанбет Бөлекпаев егін жинау науқанын толық аяқтауды, жиналған өнімді сақтау жұмыстарын ұйымдастыруды және тұрақтандыру қорын жасақтауды тапсырды.