Нашақорлық, буллинг және вейп: Қарағанды облысының колледж студенттері күрделі тақырыптарды талқылады

Қарағанды облысында полицейлер, психологтар мен еріктілер жастармен кездесіп, синтетикалық есірткіден бастап буллинг пен электронды темекілерге дейінгі өткір мәселелерді талқылады. Өңірдің колледждерінде «Заң және тәртіп» жобасы аясында бірқатар профилактикалық іс-шаралар өтті.

Бұл бастамалар облыстық полиция департаментінің, Қарағанды қаласының Жастар ресурстық орталығы мен өзге де ұйымдардың қолдауымен жүзеге асырылды.

Қарағанды техникалық-құрылыс колледжінде «Жастар арасындағы жаңа түрдегі есірткілер және нашақорлық проблемасы» атты кездесу өтті. Полиция департаментінің есірткі қылмысына қарсы іс-қимыл басқармасының аға жедел уәкілі, полиция подполковнигі Бақытжан Мұстафаев есірткі таратушылар әлеуметтік желілер мен мессенджерлерді белсенді пайдаланып, синтетикалық заттарды заңды тауар түрінде жасыратынын айтты. Студенттер көптеген сұрақ қойды: досының тәуелді екенін қалай тануға болады, «жеңіл» заттарды ұсынғанда не істеу қажет, тәуелді болған адамға қалай көмектесуге болады.

– Бүгін біз студенттерге маңызды ойды жеткізуге тырыстық: нашақорлық – тек денсаулыққа қауіп емес, ол өмір бойы әсер ететін ауыр құқықтық салдарға әкеледі. Тіпті есірткіні бір рет қолданудың өзі әкімшілік жауапкершілікке әкелсе, сақтау немесе тарату қылмыстық жауапкершілікке тартылуға себеп болады, – деді Бақытжан Мұстафаев. – Қуантатыны, студенттер белсенділік пен қызығушылық танытты.

Ал Қарағанды тамақтану және сервис колледжінде буллинг мәселесі талқыланды. Іс-шара «Стоп, буллинг: құрмет, қолдау, сенім» ұранымен өтті. Студенттер рөлдік ойындарға және пікірталастарға қатысып, психологиялық қысым мен кибербуллингке қатысты нақты жағдайларды талдауды үйренді.

— Буллинг – жай ғана ренжітетін сөздер мен әрекеттер емес, ол адамның жан дүниесінде терең із қалдыруы мүмкін психологиялық қысым. Біздің мақсатымыз – жастарға әрқашан жол барын, әрқашан қолдау болатынын көрсету, – деп атап өтті Жастар ресурстық орталығының психологы Әлия Асқамбаева.

Сериялы кездесулер Шахтинск қаласында өткен «Вейпті тапсыр – денсаулықты таңда!» акциясымен аяқталды. Оны қалалық прокуратура мен еріктілер ұйымдастырды. Тұрғындарға электронды темекілер мен никотин қосылған сұйықтықтарды символикалық сыйлықтар, салауатты өмір салты туралы буклеттер және спорттық іс-шараларға шақыру билеттері үшін тапсыру ұсынылды. 

Нәтижесінде ондаған құрылғы жиналды, ал акцияға қатысқан көптеген азамат спорттық секцияларға жазылды.