Қарағанды облысының 20 жас ғалымы Қытайда тағылымдамадан өтіп жатыр

Е. А. Бөкетов атындағы Қарағанды ұлттық университетінің жиырма жас ғалымы Қытайдың Шихэцзы университетінде тағылымдамадан өтіп жатыр. Бұл сапар – Мемлекет басшысы Қасым-Жомарт Тоқаевтың ҚХР-ға жасаған ресми сапары кезінде қол жеткізілген академиялық алмасуды дамыту туралы келісімдердің жалғасы.

Бағдарлама аясында ғылыми зерттеулерді ұйымдастырудың заманауи тәсілдерін меңгеру және түрлі елдерден келген әріптестердің тәжірибесімен танысу көзделген.

Сертификат тапсыру рәсімінде университет ректоры Нұрлан Дулатбеков бұл сапар жас мамандар үшін жаңа мүмкіндіктер ашатынын атап өтті.

– Қытаймен қарым-қатынаста ғылым мен білімнің маңызы зор. Азия – студенттер мен ғалымдар алмасуды жолға қоюға қолайлы бағытқа айналып келеді. Қазақстан бұл ретте тиімді жағдайда орналасқан, сондықтан академиялық ынтымақтастықты дамыта алады. Бүгінде біздің университеттерге шетелдік студенттер келіп жатыр, бұл бірлескен жобаларға жол ашады, – деді Нұрлан Дулатбеков.

Тағылымдама қатысушыларының бірі – Гүлнұр Алпыcова. Ол қатты дене физикасымен айналысады, кристалдық материалдардың люминесценциясын зерттейді. Қытайда ол «Бір белдеу, бір жол» бастамасына қатысушы елдер үшін су жүйелері мен ирригация бойынша семинарға қатысуда.

– Бұл тағылымдама – заманауи сумен жабдықтау және ирригация жүйелері бойынша білімді тереңдетіп, түрлі елдерден келген әріптестермен тәжірибе алмасуға мүмкіндік береді. Мен тәжірибелік тәсілдер мен инновациялық шешімдерге ерекше көңіл бөлуді жоспарлап отырмын, оларды кейін Қазақстанда бейімдеп қолдануға болады, – дейді жобаға қатысушы.

Қытайға сапар кәсіби байланыстар орнату және халықаралық әріптестікті дамыту тұрғысынан да маңызды. 

Тағылымдама қорытындысы бойынша шетелдік университеттермен ынтымақтастықтың жаңа бағыттары дамытылады деп жоспарлануда.