Қарағандыда газ тұтынушыларына арналған мобильді қосымша іске қосылды

Қарағанды облысында коммуналдық қызмет саласында заманауи цифрлық шешімдер енгізілуде. Енді газ тұтынушылары үшін арнайы мобильді қосымша қолжетімді болды. Бұл сервис қызмет көрсетушімен өзара әрекетті айтарлықтай жеңілдетеді.

— Qazaqgaz Aimaq мобильді қосымшасы газ есептеу құралдарының көрсеткіштерін тіркеу және беру процесін барынша оңайлату үшін жасалды. Енді тұтынушыларға халыққа қызмет көрсету бөлімдеріне барудың немесе телефон арқылы хабарласудың қажеті жоқ. Сонымен қатар WhatsApp сияқты мессенджерлер арқылы көрсеткіштерді жіберу сияқты қателіктер мен кешігулер де болмайды. Қосымша бірнеше қарапайым қадамнан тұрады: тіркелу, жеке есеп шотын қосу, көрсеткіштерді енгізу, тұтыну тарихын қарау, мерзімдер бойынша еске салулар алу және есеп-қисаптың ашықтығын бақылау, — деді АО «Qazaqgaz Aimaq» филиалының сату және газбен қамтамасыз ету қызметінің бас маманы Нұрхан Есенгелдиев Өңірлік коммуникациялар қызметінде өткен брифингте.

Оның сөзінше, қосымшаның басты артықшылықтары – ыңғайлылық, уақыт үнемдеу және тәулік бойы қолжетімділік.

Сонымен қатар брифинг барысында eGov платформасындағы әлеуметтік әмиян арқылы газға арналған ваучерлер жүйесі таныстырылды. Бұл жүйе әлеуметтік төлем алушылар мен тұрғын үй көмегін алушыларға арналған.

— Жергілікті атқарушы органдар қаражатты әлеуметтік әмиянға ваучер түрінде аударады. Бұл қаражат тек газға төлем жасау үшін пайдаланылады және тікелей тұтынушының жеке есеп шотына түседі. Мұндай тәсіл көмек көрсетуді мақсатқа бағыттайды, қаражаттың дұрыс қолданылмау қаупін жояды және толық ашықтықты қамтамасыз етеді, — деп түсіндірді Нұрхан Есенгелдиев.