Сауда және интеграция министрі Қарағандыдағы базарларды тексерді

Қазақстан Республикасының сауда және интеграция министрі Арман Шаққалиев жұмыс сапарымен Қарағанды облысына келіп, базарлардың және басқа да сауда нысандарының жағдайымен танысты.

Сапар барысында министр базарларды аралап, олардың жаңғыртылу барысын тексерді және инфрақұрылымды әрі қарай дамыту шараларын талқылады.

«Сауда қызметін реттеу туралы» Заңға сәйкес, 2026 жылдың 1 қаңтарға дейін елдегі барлық базарлар заманауи стационарлық нысандар форматына көшірілуі тиіс. Бұл мерзім үш рет кейінге шегерілген, сондықтан енді қайтадан ұзарту қарастырылмайды.

Қарағанды облысында бес базарды жаңғырту қажет. «Шығыс» базарында жұмыстар кестеге сәйкес жүргізіліп жатыр, нысанды іске қосу 2025 жылдың желтоқсанға жоспарланған. «Тұлпар» базарының аумағында ХҚКО мен автодром салынуда. «Алтын арба» базарының басшылығы 20 мың шаршы метрден асатын сауда үйін салуды жоспарлап отыр, құрылыс жұмыстарының басталуы төртінші тоқсанға белгіленген. «Горняк» базарында да жөндеу жұмыстары жылдың соңында аяқталады деп күтілуде. «Қайрат» базары аумағы қызметтің болмауына байланысты мемлекетменшігіне қайтарылды.

Министр базарларды инженерлік желілерге қосу, жобалық құжаттаманы келісу және қаржыландыру мәселелері шешімін таппай отырғанын атап өтті. Ол бұл міндеттерді орындау үшін негізгі жауапкершілік базар иелеріне жүктелетінін және белгіленген мерзімде аяқталуы тиіс екенін қадап айтты.

Сондай-ақ Арман Шаққалиев Қарағандыда халықпен және бизнес өкілдерімен кездесіп, азаматтарды жеке қабылдады. Министр кәсіпкерлерді қолдау мақсатында пайыздық мөлшерлемелерді субсидиялау және несиелерді кепілдендіру тетіктері жұмыс істеп жатқанын айтты. Қарағанды облысында алты инвестициялық жобаны қоса алғанда, сегіз жоба мақұлданды. 2026 жылдан бастап тауар айналымына қатысушылардың барлығы Ұлттық тауар каталогын қолдануға міндетті болады. Бұл «сауданың цифрлық айнасын» қалыптастырып, үдерістердің ашықтығын арттыруға мүмкіндік береді.

Кәсіпкерлерді қаржылай қолдау шараларымен қатар, өңірдің экспорттық әлеуетін дамытуға ерекше көңіл бөлінуде. 2025 жылдың Экспорттық акселерация бағдарламасы аясында 120 қазақстандық компания іріктелді, оның ішінде 10-ы – Қарағанды облысынан. Олар үшін оқыту бағдарламасы және сыртқы нарықтарға шығуға бағытталған кешенді практикалық қолдау көзделген. Сауда және интеграция министрлігі QazTrade ұйымымен бірлесіп, кәсіпорындарға шетел нарықтарын зерттеуге, әлеуетті серіктестер табуға және өнімдерін ілгерілету бойынша кеңес алуға көмектесуде.

Арман Шаққалиев базарларды жаңғырту Парламенттің бақылауында екенін атап өтті. Белгіленген мерзімде жұмыстарын аяқтамаған нысан иелері әкімшілік жауапкершілікке тартылып, тіпті базарлардың қызметі тоқтатылуы мүмкін.

– Біздің басты мақсатымыз – сауда нысандарын тек жаңарту ғана емес, сатып алушылар мен кәсіпкерлер үшін қолайлы әрі қауіпсіз жағдай жасау. Базарларды жаңғырту халықтың өмір сапасымен және өркениетті сауданың дамуымен тікелей байланысты, – деді министр.

2025 жылдың жеті айының қорытындысы бойынша Қарағанды облысының ішкі тауар айналымы 2,38 трлн теңгені құрап, республика көлемінің 6,3%-ын қамтамасыз етті.

Қазақстан Республикасының Сауда және интеграция министрлігінің ақпараты бойынша