«Дәуірдің көрінісі»: қарағандылықтарды суретші Петр Антоненконың көрмесіне шақырады

Қарағандыда Қарағанды суретшілер одағының негізін қалаушылардың бірі – Петр Антоненконың көрмесі өтеді. Көрермендерге суретшінің мұрагері «Алтын ғасыр» галереясына табыс еткен сирек туындылар көрсетіледі.

«Дәуірдің көрінісі» көрмесі Қарағандының қалыптасуына және оның 1950 жылдан 1970 жылға дейінгі тарихына арналған. Экспозицияға осы уақытта Петр Антоненко жасаған акварельдер, этюдтер және графикалық жұмыстар кіреді.

– Суретшінің осы көрмеге арналған жұмыстарын бізге оның мұрагері Любовь Антоненко ұсынды. Барлығы бізге 80-ге жуық жұмыс берілді. Бұл акварельдер мен графикалық суреттер, – дейді «Алтын ғасыр» галереясының жетекшісі Бибігүл Исполова.

Петр Антоненко Шығыс Қазақстан облысында 1921 жылы дүниеге келген. Самарқанд пен Алматыда Павел Беньков және Абрам Черкасский сияқты шеберлерден білім алған. Петр Антоненко өз жұмыстарын 1948 жылы шығара бастады.

Қарағандыда суретші түрлі жанрда жұмыс істеді: портрет, пейзаж, натюрморт. Сондай-ақ, монументті мозаика мен суреттер жасаған. Өз еңбектерінде қарағандылықтардың тұрмыс-тіршілігін, қала көшелерін және олардың тарихын бейнелеген.

Петр Антоненконың жұмыстарының бір бөлігі Ә.Қастеев атындағы Мемлекеттік өнер мұражайында, сондай-ақ жеке коллекцияларда сақталуда.

Суретшінің суреттерін көргісі келетіндер 30 тамызда «Алтын ғасыр» галереясына шақырылады. Ашылуы сағат 16:00. Кіру тегін. Көрме 10 қыркүйекке дейін жалғасады.