Балқашта ТКШ және инфрақұрылымды ауқымды жаңғырту: не жасалды
Балқашта басты жылу көзінде жөндеу жұмыстары аяқталып, коммуналдық желілерді жаңғырту жалғасуда. Қарағанды облысының әкімі Ермағанбет Бөлекпаев жұмыс сапары барысында нысандардың жылу беру маусымына дайындығын тексерді.
Қаланың басты жылу көзі Балқаш ЖЭО-да № 6, 7, 8 қазандық агрегаттары мен № 2, 6, 7 турбоагрегаттарының ағымдағы жөндеу жұмыстары аяқталды. Қазір № 9 қазандық агрегаты мен № 3 турбоагрегат күрделі жөндеуден өтіп, отын қоры қалыптасуда. 1 қыркүйектен бастап № 1 және 2 жылу магистральдарын нығыздау және жуу басталады.
Сонымен қатар, қалада инженерлік инфрақұрылым жаңартылып, аумақтар абаттандырылады. Магистральдық және орамішілік жылу желілерінің 23,8 шақырымының 14 шақырымы ауыстырылды.
Сумен жабдықтау жүйесінде де өзгерістер болып жатыр.
Су құбырларын қайта жаңартудың екінші және үшінші кезегі шеңберінде соңғы екі жылда 44 шақырым желі жаңартылды, бұл апаттылықты айтарлықтай төмендетуге мүмкіндік берді.
Биыл қосымша 13 шақырым жол ауыстырылды.
Кәріз жүйесі де назардан тыс қалмайды.
Өткен жылы облыстық бюджеттің қолдауымен кәріз коллекторын қайта жөндеу басталды, бүгінде 7,2 шақырым жол жаңартылды.
Электр желілерін жаңғырту бойынша да жұмыстар жүргізілуде: биыл 12,3 шақырым желі жөнделіп, сегіз трансформатор ауыстырылды.
– Биыл қаржыландыру екі есеге жуық ұлғайды. Бұл қаражаттың едәуір бөлігі ТКШ саласына бағытталады. Иә, бұл жұмыс үнемі көзге түспейді, бірақ ол өте маңызды, – деді Ермағанбет Бөлекпаев. – Егер желілерді қазір жаңартпасақ, ертең күрделі проблемаларға тап болуымыз мүмкін. Сондықтан инженерлік желілерге ауқымды жөндеу жұмыстары жүргізілуде.
Саяқ кентіне де ерекше көңіл бөлінеді. Тұрғындарды сапалы жылумен қамтамасыз ету үшін 2023 жылдан бастап жылу желілерін қайта құру жобасы іске асырылуда. Өткен жылы 8,7 шақырым желі жаңартылып, пайдалануға берілді. Қазір жаңа қазандықтың құрылысы жүріп жатыр.
– Алдағы жылыту маусымына дайындық штаттық режимде жүріп жатыр. Гидравликалық сынақтар 608 көппәтерлі тұрғын үйдің 480-інде жүргізілді, дайындық актілері ресімделді. 15 қыркүйекке дейін барлық жұмыстар орындалуы тиіс, – деп атап өтті Балқаш қаласының әкімі Сапар Сатаев.
Балқашта коммуналдық инфрақұрылымды жаңғыртумен қатар туристік бағыт та белсенді дамып келеді.
Облыс әкімі әуежайды жаңғырту барысымен танысты.
Ұшу-қону жолағы жаңартылды, магистральды рульдеу жолы салынды, асфальт-бетон жабыны бар перрон жабдықталды.
Жылыту жүйесін, су құбырының негізгі желісін, желдету жүйесін және басқа да инженерлік коммуникацияларды монтаждау бойынша жұмыстар жүргізілді.
Қазір ішкі және сыртқы әрлеу жұмыстары,
аумақты абаттандыру және жарықтандыру жұмыстары аяқталуда.
Жаңғыртудың барлық кезеңдері аяқталғаннан кейін әуежайдың өткізу қабілеті сағатына 80 жолаушыға дейін артады.
Сондай-ақ, әуежай қажеттіліктері үшін жаңа өрт сөндіру көліктері сатып алынды.
Қала инфрақұрылымын дамыту және өңірдің туристік тартымдылығын арттыру үшін жағалауды қайта жаңарту жүргізілуде. Жұмыстар жалғасуда.
Білім беру саласында да өзгерістер бар. Биыл Балқашта «Жайлы мектеп» ұлттық жобасы бойынша салынған 900 орындық жаңа мектепті ашу жоспарлануда.
Сонымен қатар, Абай көшесі, 45 мекенжайындағы Балалар мен жасөспірімдерге арналған техникалық шығармашылық орталығы орналасқан ғимаратқа жөндеу жұмыстары жалғасуда.
Облыс басшысы жаңа әлеуметтік павильондарды аралап көрді. Қыркүйек айында Русаков және Шашубай шағын аудандарында екі павильон ашу жоспарланған.
Мұнда тұрғындар әлеуметтік маңызы бар өнімдерді нарықтағыдан 10–15% арзан бағамен сатып ала алады.
