Приозерск қаласында алдағы жылу беру маусымына қарай инженерлік инфрақұрылым жаңартылуда

Приозерск қаласында қыста сенімді жылумен қамтамасыз ету үшін қазандық жабдықтары жаңартылып, инженерлік инфрақұрылым жөнделуде. 

Қарағанды облысының әкімі Ермағанбет Бөлекпаев қалаға жұмыс сапары барысында жылу беру маусымына дайындықты тексерді.

Аймақ басшысы № 1 қазандықта болып, инфрақұрылым мен құрылыс нысандарын аралап көрді.

№ 1 қазандық – қаланы жылумен жабдықтаудың негізгі объектісі. 1974 жылы салынған. Ол жыл сайын 191 520 Гкал жылу өндіреді, бұл қаланы тұрақты жабдықтауға мүмкіндік береді. 

Нысанда № 2 және 3 қазандықтар, жылу алмастырғыш, экономайзер, аккумуляторлық бак және ғимараттың шатыры жөнделуде.

Сондай-ақ оқшауланған жылу трассалары жаңартылады. Жоспарланған 2 шақырымның 1,7 шақырымы ауыстырылды. Ұзындығы 750 метр болатын тұрғын үйлердің құбырларында жұмыстар жүргізілуде. Су құбыры мен кәріз учаскесінің бір километрі ауыстырылуда.

– Қазір басты міндеттердің бірі – жылыту маусымына дайындық. Барлық жұмыстар сапалы және мерзімінде орындалуы тиіс, тұрғындар осы маусымда өз нәтижелерін сезінуі тиіс, – деп атап өтті өңір басшысы.

Ермағанбет Бөлекпаев басқа да нысандармен танысты. Қалада 20 пәтерлі үй салынды. 

Онда кезекте тұрғандар үшін пәтерлер сатып алынады.

Сондай-ақ облыс әкіміне дене шынықтыру-сауықтыру кешеніндегі жұмыстар туралы баяндалды. 

Мердігер жұмыстарды аяқтап, техникалық қадағалаудың анықталған ескертулерін түзетеді. Содан кейін аумақты абаттандыру жұмыстары басталады.