Қарағанды облысының диқандары шамамен бір миллион тонна дән жинауды жоспарлап отыр
Қарағанды облысында егіс жинау науқанына дайындық аяқталуға жақын. Алдын ала болжам бойынша, өңір аграршылары 946 мың тонна дән жинауы тиіс, оның ішінде 817 мың тоннасы бидай.
Егісті жинауға дайындық пен ауыл шаруашылығын қолдау шаралары туралы ақпаратты облыс әкімі Ермағанбет Бөлекпаевпен өткен кездесуде ауыл шаруашылығы өнімдерін өндірушілер талқылады.
Сол жиында шаруашылық өкілдері өздерін қызықтырған сұрақтарын қойып, басқарма мен қаржы институттарының жауаптарын алды.
– Негізгі міндет – егісті сапалы әрі уақытында жинау. Көктемде де, қазіргі кезеңде де ауа райы айтарлықтай қолайлы емес. Дегенмен жоспарланған барлық алқаптар игерілген. Жаздағы ылғал дәнді дақыл өнімділігін арттыруға ықпал етеді, – деді Ермаганбет Бөлекпаев.
Болашақ өнімнің қауіпсіздігін қамтамасыз ету үшін облыста жалпы қуаты 145 мың тонна болатын 4 лицензияланған астық қабылдау кәсіпорны және 340,2 мың тоннаға арналған 138 картоп пен көкөніс қоймасы жұмыс істейді. Жыл соңына дейін астық қоймаларының қуаты 18 мың тоннаға, ал көкөніс қоймалары – 12 мың тоннаға ұлғайтылмақ.
– Картоп өнімі 265,2 мың тонна, көкөніс – 38,5 мың тонна болады, – деді Ауыл шаруашылығы басқармасының басшысы Ануар Тюлюбеков. – Егісті жинауға шамамен 2 мың астық комбайны, 220 картоп жинау машинасы және 162 картоп қазғыш тартылатын болады. Жаппай жинау қыркүйектің басында басталады.
Қазір Абай, Бұқар-Жырау, Нұра және Осакаров аудандарында кейбір шаруашылықтар егіс жинау жұмыстарын бастап кетті. 5,3 мың гектар дәнді дақыл жиналып, 4,4 мың тонна астық алынды. 240 гектардан 5,4 мың тонна ерте пісетін картоп жиналған.
Әртараптандыру бағдарламасы аясында майлы және жемдік дақылдарға арналған алқаптар ұлғайған.
– Өткен жылы алғаш рет күнбағыс өсіріп, жақсы өнім алдық. Биыл майлы дақылдарға арналған алқаптар 3500 гектарға дейін ұлғайды. Бұл дақылға сұраныс бар. Өңдеу және сақтау үшін қосымша кептіргіштер, өңдеу пункттері мен қоймалар салдық. Мемлекеттік қолдау бар, – деді «Ясная Поляна» шаруашылығының басшысы Михаил Чолокиди.
Ауыл шаруашылығы өндірушілері суармалы жерлерді де кеңейтуде. «Евразия Инвест Ltd» кәсіпорнының басшысы Серік Жүнісовтың айтуынша, тамшылатып суарылатын жерлердегі дақыл өнімділігі облыс бойынша орташа көрсеткіштен жоғары.
– Биыл 4 мыңнан астам гектар суармалы жер енгіздік. Келер жылы оны 10 мың гектарға жеткіземіз. Қазір картоп мен жүгері алқаптары тамшылатып суарылады. 6 мың басқа арналған ферма салу жобасы жүзеге асырылуда. Ол үшін жемдік база дайындап, рапс, жоңышқа, күнбағыс өсіріп жатырмыз. Суару құрғақшылық пен қолайсыз ауа райының тәуекелін азайтып, өнімділікті арттырады, – деді Серік Жүнісов.
Облыстың ірі астық аймағы – Осакаров ауданы – осы маусымда 449 мың тонна дәнді, 25 мың тонна картоп және 64 мың тонна майлы дақыл жинауды жоспарлап отыр. Егістік көлемі бойынша екінші орында тұрған Нұра ауданы 303 мың тонна дәнді, 36 мың тонна картоп және 13 мың тонна майлы дақыл күтуде.
Шаруашылықтарды техникалық қамтамасыз етуге ерекше көңіл бөлінуде.
Аудандардың әкімдері ауыл шаруашылығы техникасының дайын екенін баяндады. Егістікке күзгі тыңайтқыш пен жанар-жағар май жеткізуге ерекше назар аударылған. Ауыл шаруашылығын қаржыландыру мен қолдау әртүрлі бағдарламалар арқылы жүзеге асырылады.
– Жалпы, егіс жинау науқаны оңай болмайды. Астық комбайндарын гектар бойынша дайындау, астық қоймалары мен кептіргіштерді ұйымдастыру, өнімді шығару қажет. Қосымша дизель отынын дайындау маңызды. Ең бастысы – жергілікті жерде жұмысты үйлестіріп, барлығы дұрыс ұйымдастырылуы керек. Барлық шаруашылықтарға бірдей көмек көрсету қажет: ірісіне де, шағындарына да. Аудан әкімдеріне, ауыл шаруашылығы басқармасына егісті сапалы аяқтауға, техниканы дайындауға, дизель жеткізуге, 2026 жылғы егістікке тұқым дайындауға, тыңайтқыш мәселесін шешуге, картоп пен басқа көкөністер бойынша тұрақтандыру қорын құру меморандумын жасауға тапсырма беремін, – деді Ермаганбет Бөлекпаев.