«Ұлылардың ұлысы – Абай»: Қарағандыда өткен әдеби-музыкалық кеште хакімнің жыры мен әні асқақтады

Қарағанды қаласының Орталық мәдениет және демалыс саябағында ұлы ойшыл, ақын және ағартушы Абай Құнанбайұлының шығармашылығына арналған иммерсивті поэзия кеші өтті. «Ұлылардың ұлысы – Абай» атты рухани іс-шара көрермендерді ақын мұрасының тереңіне бойлатты.

Музыкалық бөлім — «Абайдың ән әлемі» — жас өнерпаздардың орындауында хакімнің мәңгілік әуендерін жаңғыртты. 

Қ. Байжанов атындағы концерттік бірлестіктің солисі Нұрбол Темірғалиевтің жүрекке жеткен «Көзімнің қарасы» әні кеш көрермендерінің ерекше ықыласына бөленді.

Әдеби бөлім — «Қара сөздер кеңістігі» — қонақтарды Абайдың адамгершілік, білім мен рухани бірлікке шақырған ой-толғамдарымен сусындатты. Қатысушылар философиялық трактаттарынан үзінділер тыңдап, пікір алмасты. Әрбір келген жан «Абайға хат» айдарында ұлы ағартушыға арнау жазып қалдырды. 

Сондай-ақ, кеш бағдарламасында ақынның өмірі мен шығармашылығына арналған викторина, ал «еркін микрофон» алаңы кез келген көрерменге сүйікті өлеңін оқу немесе әнін орындау мүмкіндігін сыйлады.

Шараға қатысушылардың арасында Ақтөбе облысы Шалқар ауданынан келген, қазіргі таңда Қарағандыдағы 5451 әскери бөлімінде отан алдындағы борышын өтеп жүрген 20 жастағы Самғат Саяхатов та бар.

— Әкем кішкентайымнан Абай мен Әуезовті оқуға баулыды. Әскерде де арнайы кітап оқу уақыты белгіленген. Бүгін хакімнің 19-қара сөзін оқыдым. Онда ақыл мен білімге ұмтылу жайында терең ой айтылады. Абай — ізгілікті өмір сүрудің алтын қағидаларын қалдырған тұлға. Оның сөзі адалдыққа, өзіңе және өзгеге құрметпен қарауға үйретеді, — дейді ол.

Іс-шараны Н. В. Гоголь атындағы әмбебап ғылыми кітапхана Қарағанды облысының мәдениет, архивтер және құжаттама басқармасының қолдауымен ұйымдастырды.

Фото: Қайныш Бұхарбай