Қарағанды облысында дәрігер тапшылығын жоюға бағытталған қосымша шаралар қабылдануда

Қазіргі таңда Қарағанды облысында жалпы тәжірибелік және бейінді мамандарды қоса есептегенде 137 дәрігер жетіспейді. Бұл мәселе аймақ әкімі Ермағанбет Бөлекпаевтың төрағалығымен өткен кеңесте негізгі тақырып болды.

Қарағанды медицина университетінің ректоры Бақыт Көшерованың айтуынша, оқу орны студенттерінің небәрі 24 пайызы ғана – Қарағанды облысының тумалары. Яғни, өңірде қалып еңбек етуі мүмкін түлектердің үлесі өте аз.

Интернатура бойынша биылғы бөлініске сәйкес, облысқа 79 жалпы тәжірибелік дәрігер жолданған, оның тек 23-і – жергілікті түлектер. Сондай-ақ 54 стоматолог жіберілді. Алайда, бұл мамандардың бір бөлігі резидентурада оқуын жалғастыруы ықтимал.

Өткен жылы өңірде 210 жас дәрігер жұмыспен қамтылды, олардың 106-сы ауылдық жерлерге жолданған. Биыл 219 маман келеді деп жоспарланған: 79 интерн және 140 резидент. Резиденттердің қатарында акушер-гинекологтар, радиологтар, невропатологтар, анестезиолог-реаниматологтар, педиатрлар және өзге де салалық мамандар бар. Дегенмен, олардың көпшілігі облыс орталығы мен моноқалаларды таңдауда, ал аудандық жерлерге аз ғана бөлігі барады.

Облыстық денсаулық сақтау басқармасының басшысы Самат Кенжебаевтың айтуынша, кадр тартудағы маңызды тетіктің бірі – «Дипломмен – ауылға!» бағдарламасы.

— Бағдарлама аясында 100 АЕК мөлшерінде біржолғы көтерме ақы және 2500 АЕК көлемінде баспана сатып алуға қаражат қарастырылған. Тұрғын үй мәселесі – мамандарды тұрақтандырудағы негізгі фактор. Мәселен, биыл Нұра ауданында медицина қызметкерлеріне арналған 14 пәтерлі тұрғын үй пайдалануға беріледі. Бұл қадам аудандағы кадр тапшылығын айтарлықтай азайтады, — деді ол.

Аймақ әкімі Ермағанбет Бөлекпаев өңірде өз медициналық университетінің болуы – кадрмен қамтамасыз етуде елеулі артықшылық екенін атап өтті.

— Мақсат – мамандарды бізге жұмысқа тарту ғана емес, олардың осында тұрақтап қалуын қамтамасыз ету. Бұл үшін тиімді қолдау тетіктерін әзірлеп, баспанамен қамту, ипотекалық жеңілдіктер ұсыну қажет. Әр аудан бұл мәселеге жіті назар аударуы тиіс, ал біз барлық қажетті қолдауды көрсетеміз. Тек бірлесе әрекет еткенде ғана мәселені түбегейлі шеше аламыз, — деді облыс әкімі.

Қазір өңірде медициналық ұйымдарды кадрлармен қамтамасыз етуге арналған үш жылдық жол картасы дайындалуда. Құжат Қарағанды медицина университетімен бірлесе әзірленіп, мамандарды бекітуге бағытталған нақты шараларды қамтитын болады. Сондай-ақ ерте кәсіби бағдар беру ісіне айрықша мән беріледі. Мектептердегі медициналық сыныптар нақты нәтижеге қол жеткізуі тиіс.