Бұқар жырау ауданының жастары туристік слётте төзімділік пен шеберліктерін сынға салды

Өткен демалыс күндері Бұқар жырау ауданының жастары үшін әсерге толы болды. Центральное ауылында, әйгілі каньон маңында дәстүрлі жастар туристік слёті өтті. Ауқымды шараға ауданның түрлі ауылдық округтерінен жеті команда қатысып, өзара бақ сынады.

Қатысушыларға бірқатар күрделі кезеңдерден өтуге тура келді: 

жарға өрмелеу, палатканы белгіленген уақыт ішінде құру, туристік түйіндер байлау, 

от жағу, ең үздік дала тағамын дайындау және эстафеталық таяқшамен кросс қашықтықты жүгіріп өту. Бұл кезеңнің мәресі Рахымжан Қошқарбаев биіктігінде орналасқан. 

Слёттің басты сынағы – командалардың төзімділігі, ептілігі мен бірлігін айқындайтын үлкен туристік эстафета болды.

Жалпыкомандалық есепте бірінші орынды Центральное ауылының командасы жеңіп алды. Екінші және үшінші орындарды Габиден Мұстафин кентінен келген командалар өзара бөлісті. Ал басты кезең – үлкен туристік эстафетада айқын басымдықпен сол Мұстафин кентінің командасы топ жарды.

Алайда туристік слёт тек жарыс алаңы ғана емес, демалыс орнына да айналды. 

Қатысушылар волейбол ойнап, кешкісін гитарамен ән айтып, әсерлерімен бөлісті. Бұл – достық пен сергек рухты біріктіретін, ұмытылмас атмосфераға толы шара болды.

Іс-шараны ұйымдастырған – Бұқар жырау ауданы әкімдігінің Жастар ресурстық орталығы.

Бұқар жырау ауданы әкімдігінің ақпараты бойынша