Қарағанды облысында Талды алқабында зерттеулер жалғасуда

Қарағанды облысының Шет ауданында Талды тарихи-археологиялық саябағының аумағында ерте темір дәуірінен қалған тағы бір ескерткіш табылды. Мұнда Е.А. Бөкетов атындағы Қарағанды университетінің археологтары зерттеу жұмыстарын жүргізуде. Олар қорғандардың біріндегі тас үйіндісінің астынан табылған Қорғантас типтес кешенін тапты.

-  Мұндай жерлеу түрі біздің облыста аз, оның үстіне бейіт қирамаған, бұл өте маңызды. Марқұмның арқасындағы қалып ерте темір дәуірінің ескерткіштеріне тән. Талды тарихи-археологиялық саябағының аумағындағы қазба жұмыстары Қарағанды облысының мәдениет, мұрағаттар және құжаттама басқармасының қолдауымен жалғасады. Онда жұмыстар биыл да, келесі жылы да жүргізілетін болады, - дейді Сарыарқа археологиялық институтының директоры Алексей Кукушкин.

Талды алқабы - Орталық Қазақстан аумағындағы ежелгі өмір орталықтарының бірі. Талды тарихи-археологиялық саябағы темір дәуірінен орта ғасырға дейінгі көшпенділердің тарихын ашады. Оған 200-ге жуық түрлі дәуірлердегі ескерткіштер кіреді. Олардың ішінде Қаражартас қорымының құрамына кіретін далалық пирамида бар.

Мұнда археологиялық қазба жұмыстары әр маусымда жүргізіледі. Жаңа жаңалықтар ашылуда.

Ғалымдардың айтуынша, бұл маусымдағы олжа - қола дәуіріндегі тас жәшіктің жабындысына салынған қосымша көму. Археологтар ежелгі адамның сүйектерінен басқа ұсақ малдың үш бас сүйегін және қатты тотыққан темір бұйымдарын тапты.

Мұндай жерлеулер біздің дәуірге дейінгі IV-I ғасырларға жатады деген болжам жасалып отыр. Нақтысы зерттеуден кейін анықталады.