Қарағандылықтарға балалардың терезеден құлауына жол бермеуге бағытталған қауіпсіздік шаралары туралы еске салды
Қарағанды облысында «Қауіпсіз терезе» алдын алу акциясы өтті. Оған құтқарушылардан бөлек балалармен жұмыс істейтін мекемелер де тартылды. Құрылыс салушылармен және терезе өндірушілермен кездесу өтті. Басты мақсат - балаларды қорғау, қайғылы оқиғалардың алдын алу. Ұйымдастырушылар ата-аналарды қауіпсіздік техникасы ережелерін сақтауға, өз үйлерін қорғауға және балаларын қадағалауға шақырады.
Балалар қызық көріп, ашық терезеге ұмтылатыны сөзсіз. Өкінішке қарай, облыста төтенше оқиғалар орын алып, өлім-жітіммен аяқталған кездер де бар.
Бала білместіктен сүйенетін москит торы үлкен қауіп төндіреді. Бұл ретте бұғаттағыштарды пайдалану маңызды, деп еске салады өңірдің ТЖД мамандары. Сондай-ақ ашық балкондардың жанында балалардың ойынауына тыйым салып, барынша қорғау қажет. Терезенің жанына бала өрмелеп шығып, баспалдақ ретінде қолданатын жиһаз заттарын қоюға болмайды. Бүлдіршіндерге терезенің қалай ашылатынын көрсетудің қажеті жоқ.
- Құрылыс салушылармен және терезе өндірушілермен кездесулер өткіздік. Құрылыс салушылар тарапынан бұғаттағыштарды бұрын тапсырылған нысандарға орнату керектігі туралы айтқанымызда, олар келісті. Сондай-ақ, әлеуметтік осал отбасылардың пәтерлерінде 187 терезе блокираторы орнатылған. Мұндай құрылғылар арзан және барлық жерде сатылады. Оларды орнату - қайғылы оқиғаны болдырмаудың ең тиімді тәсілдерінің бірі, - деді облыс ТЖД бастығының орынбасары Думан Далешов Өңірлік коммуникациялар қызметінде өткен брифингте.
Білім басқармасы басшысының орынбасарының міндетін атқарушы Алма Қаңтарбаеваның айтуынша, ата-аналармен профилактикалық әңгімелесулер тұрақты түрде өткізіледі. Педагогтар тұрмыстағы ықтимал қауіптер мен қауіпсіздік ережелері туралы айтады.
Акция барысында ТЖД қызметкерлері білім бөлімінің өкілдерімен бірлесіп «Терезе - ойыншық емес!» атты интерактивті сабақтар өткізді. Балаларға терезенің қауіптілігі туралы бейнеролик көрсетіліп, қауіпсіздік ережелері ойын түрінде түсіндірілді. Ата-аналар мен тәрбиешілерге жадынамалар таратылып, мамандар терезе блокираторларының тұсаукесерін өткізді.
Медициналық мекемелерде QR-кодтары бар ақпараттық тақтайшалар орналастырылды.