Қарағандыда үстел теннисінен республикалық чемпионат өтуде

Қарағандыға еліміздің түкпір-түкпірінен 250-ден астам жас теннисші жиналды. Қазақстанда алғаш рет 11 және одан кіші жастағы шағын ракетка шеберлерінің республикалық чемпионаты ұйымдастырылды. Шара Қарағанды қаласының Saryarka үстел теннисі орталығында өтуде. Біріншілікті өткізу орны кездейсоқ таңдалмаған: қарағандылық үстел теннисі мектебі еліміздегі ең үздіктердің бірі болып саналады. Оның тәрбиеленушілері – ұлттық чемпионаттардың, клубтық турнирлердің, спартакиадалар мен халықаралық жарыстардың тұрақты жеңімпаздары мен жүлдегерлері.

Жарыс 3 маусымда басталып, 8 маусымға дейін жалғасады.

Чемпионатқа 19 ерлер командасы мен 16 қыздар командасы қатысады. Спортшылар командалық, жеке, жұптық және аралас разрядтарда ойнайды.

– Бұл үстел теннисінен 2014 жылы туған және одан кіші спортшылар арасындағы алғашқы республикалық чемпионат. Біздің жас теннисшілеріміздің халықаралық турнирлерге қатысу үшін ұлттық құрамаға үздіктерді іріктеуді жалғастыра беретінін көреміз, – дейді жарыстың бас төрешісі, үстел теннисінен ҚР ұлттық құрамасының бас бапкері Эльмира Әлиева.

Қарағанды облысы екі команда ұсынды.

Қарағандылық Жансая Тілегенова бес жастан бастап үстел теннисімен айналысады. Бүгінде мектеп оқушысының көптеген марапаттары бар.

– Үстел теннисінен әлем чемпионы болғым келеді. Қатты жаттығамын, жазғы демалыста жаттығуларды өткізбеймін, өйткені спорттық формамды ұстауым керек. Чемпионатта жеке және аралас жарыстарда өнер көрсетемін. Біздің команда өте мықты және тату, біз жеңімпаз боламыз деп үміттенемін, – деп бөлісті жарысқа қатысушы.

Чемпионаттың жеңімпаздары мен жүлдегерлері дипломдармен және медальдармен марапатталады.

Фото Қарағанды облысы дене шынықтыру және спорт басқармасынан