«Жүргізушіге хат»: қарағандылық оқушылар ересектерге жолдағы қауіпсіздік туралы еске салды

Бүгін Қарағанды қаласындағы №19 орта мектебінің аумағы интерактивті ойын элементтері бар оқыту алаңына айналды: мұнда «Абайлаңыз, балалар!» акциясы аясында танымдық және профилактикалық іс-шаралар өтті. 5–11 сынып оқушыларына жол жүру ережелері, өрт қауіпсіздігі, алғашқы медициналық көмек көрсету дағдылары және төтенше жағдайлар кезінде қайда жүгіну керектігі бойынша көрнекі түрде түсіндіру жұмыстары жүргізілді. Ал бастауыш сынып оқушыларына тұрмыста жиі кездесетін қателіктер және олардың қандай қауіптерге алып келуі мүмкін екені көрсетілді.

Акцияның басты мақсаты – жаз мезгілінде балалардың қауіпсіздігін қамтамасыз ету қажеттілігін еске салу, өйткені бұл кезеңде олар аса белсенді әрі осал болады.

Сондай-ақ «Жүргізушіге хат» жобасына қатысқан балалар алдын ала жол қозғалысы ережелерін сақтау, абай болу және әрбір жаяу жүргінші – біреудің баласы, ата-анасы немесе досы екенін ұмытпау туралы жүргізушілерге хат жазды. Полиция қызметкерлері бұл хаттарды көлік жүргізушілеріне табыстады.

Акцияның соңында балаларға арнайы қызметтердің техникасы көрсетіліп, құтқарушылар мен полицейлердің жұмысы таныстырылды. Балалар құтқарушылар мен полицейлердің жұмысына үлкен қызығушылық танытты. 

Қарағанды қаласы әкімдігінің ақпараты бойынша