Абай атындағы көркемсөз оқу шеберлерінің облыстық байқауының ЕРЕЖЕСІ

Абай атындағы көркемсөз оқу шеберлерінің облыстық байқауының ЕРЕЖЕСІ

Қарағанды облысының тілдерді дамыту жөніндегі басқармасы 2025 жылғы 1 тамызда қазақтың ұлы ақыны, ағартушы Абай Құнанбайұлының 180 жылдығын тойлау қарсаңында Абай атындағы көркемсөз оқу шеберлерінің облыстық байқауын өткізеді.

Байқаудың мақсаты: жастар арасында қазақ халқының әдеби мұрасын, Абай шығармаларын насихаттау арқылы мемлекеттік тілдің қолданыс аясын кеңейту, оның қоғамдық мәртебесін арттыру, сондай-ақ ұлы тұлғалардың поэзиясына, ұлттық рухани мұраға деген сүйіспеншілікті қалыптастыру.

Байқау 2 кезеңнен тұрады:

І кезең - «Өлең – сөздің патшасы, сөз сарасы». Бұл кезеңде қатысушылар Абайдың өлеңдерін немесе оның ақын шәкірттерінің шығармаларын жатқа мәнерлеп оқиды.

ІІ кезең - «Абайдың қара сөздері». Бұл кезеңде қатысушылар Абайдың қара сөздерін немесе белгілі қазақ жазушыларының Абайдың өмірі мен шығармашылығына қатысты туындыларынан үзіндіні жатқа мәнерлеп оқиды.

Байқау шарты:

1) байқауға Қарағанды облысының 16-35 жастағы тұрғындары қатыса алады;

2) байқау мемлекеттік тілде өткізіледі;

3) прозалық және поэзиялық шығармалардың әрқайсысын оқу уақыты 2 минуттан аспауы керек;

4) қатысушылар прозалық және поэзиялық шығармаларды жатқа оқуы тиіс;

5) фонограмма пайдалануға тыйым салынады.

Байқау жеңімпаздарын анықтау:

Әділқазылар алқасы жеңімпаздарды дауыс беру арқылы анықтайды және қатысушылардың өнерін бағалау кезінде төмендегі талаптарды ескереді:

1) шығарма мәтінін оқу шеберлігі;

2) дауыс мәнері, әуезділігі;

3) шығарманы таңдау талғамы;

4) сахналық образдың үйлесімдігі. 

Байқау жеңімпаздары дипломдармен, ақшалай жүлде қорымен, қатысушылар алғысхаттармен марапатталады.

Жүлде қоры (салықтық төлемдерді қоспағанда): 

І орын (біреу) – 150 000 (жүз елу мың) теңге;

ІІ орын (екеу) ­­– 100 000 (жүз мың) теңге;

ІІІ орын (үшеу)  – 50 000 (елу мың) теңге;

Байқауға қатысу туралы өтінім 2025 жылғы 28 шілдеге дейін жеке куәліктің көшірмесімен бірге qaz_lingva@mail.ru электрондық поштасы арқылы қабылданады.

Анықтама телефондары: 8/7212/51-38-00,  8-778-283-16-01 (WhatsApp).

 

                                                    Өтінім нысаны

№ Толық аты-жөні Туған күні, айы, жылы Жұмыс немесе оқу орны Оқитын шығармасы (авторын көрсету қажет) Байланыс телефоны
поэзия проза
1