Қарағандылық еркін күрес балуандары Қазақстан чемпионатында төрт медальға ие болды

Жарыс Алматы қаласында өтті. Жавохир Иристаев (57 кг.), Әділ Оспанов (65 кг.), Серік Бақытханов (97 кг.) ел чемпионатының үш күміс жүлдесін біздің облыс құрамасының қоржынына салды, ал Азат Оганесян (61 кг.) қола медальді жеңіп алды. Бұл өте жақсы нәтиже екенін атап өтуіміз керек! Финалда біздің жас жігіттер (20-21 жас аралығындағы) жеңіс үшін Қазақстанның ең мықты палуандарымен күресті. Мысалы, Әділ Оспановтың қарсыласы Азия және Әлем чемпионаттарының медалін жеңіп алған тәжірибелі спортшы Дәулет Ниязбеков болса, Серік Бақытхановтың қарсыласы Олимпиада ойындарының қатысушысы болды.   

Мамандар атап өткендей, өңірлердегі спортшылар чемпионатқа әртүрлі дайындалған. Олардың кейбіреулері пандемияға қарамастан жаттығу процесін үзген жоқ. Атап айтқанда, Қарағанды, Петропавл және Ақмола облыстарының спортшылары жаттығу жиындарын өткізуге мүмкіндік тапты. Сондықтан болар, осы аймақтардың балуандары басқаларға қарағанда ең жақсы көрсеткіштерге қол жеткізді.

Өткен жарыстар, шын мәнінде, келесі жылдың ақпан айында Алматыда өтуі тиіс Азия чемпионатына іріктеу болды. Ал әзірше, еркін күрестен Қазақстан құрамасының бас бапкері Әсет Серікбаевтың айтуынша, еркін күрес шеберлері осы жылдың 29 қарашасынан бастап 26 желтоқсан аралығында «Ақбұлақ» Олимпиадалық орталығында жиын өткізеді.

Бейне финал: Ерғали Әлішер (Жамбыл облысы) - Серік Бақытханов (Қарағанды облысы).