Шет ауданында жол-көлік оқиғаларына жедел көмек көрсететін алғашқы реанимобиль іске қосылды

Қарағанды облысының Шет ауданында алғаш рет трассаларда жұмыс істеуге арналған арнайы реанимобиль пайдалануға берілді. Құтқару қызметінің жаңа көлігі ҚР Төтенше жағдайлар министрлігінің жол-медициналық-құтқару қызметінің қарамағына беріліп, жол-көлік оқиғалары мен өзге де төтенше жағдайлар кезінде тікелей автожолдарға шығады.
Жаңа реанимобильдің басты міндеті — зардап шеккендерге ең алғашқы, шешуші минуттарда шұғыл медициналық көмек көрсету. Арнайы автокөлік заманауи медициналық құрал-жабдықтармен толық қамтылған, бұл оқиға орнында реанимациялық шаралар жүргізуге, науқастың жағдайын тұрақтандыруға және оны жедел жәрдем бригадаларына немесе медициналық мекемелерге жеткізуге мүмкіндік береді.
Сонымен қатар трасса бойындағы жол-медициналық-құтқару бекетіне өздігінен жүгінген жүргізушілер мен жолаушылар да қажетті көмекті ала алады.
Мұндай реанимобильдің іске қосылуы автожолдарда медициналық көмектің көрсетілу уақытын қысқартып, адам өмірін сақтап қалу мүмкіндігін арттыруға бағытталған.