Есепшіден тракторшыға дейін: Шет ауданының тұрғыны стереотиптерді бұзуда

Қарағанды облысы Шет ауданы Майбас қыстағының тұрғыны Арайлым Байдашова бес жылдан бері өз отбасының фермерлік шаруашылығында трактор жүргізіп келеді. Отыз жастағы үш баланың анасы ауыр техниканың құлағында ойнайды, жұбайымен бірге ауыл шаруашылығы жұмыстарының барлық түрлерімен айналысады және басқа ауыл тұрғындарын күрделі жұмыстан қорықпауға шабыттандырады.
Арайлым «есеп және аудит» мамандығы бойынша білім алған. Бірақ жермен жұмыс істеген оның жанына әлдеқайда жақынырақ. Олар жұбайымен бірге жылқы мен ірі қара мал өсіреді, қымыз жасайды, шөп дайындайды.
Жас әйел тракторды басқаруды бес жыл бұрын үйренген. Бастапқыда бұл күрделі көрінген, себебі техника ескі болатын, жиі бұзылатын, оны қайта-қайта жөндеуге және трактордың құрылымын да түсінуге тура келетін.
– Бастапқыда қиын болды, бірақ мен бұл істі атқара алатыныма сенетінмін, өйткені шаруашылықтың жолға қойылғанын қатты қалаймын, – деп еске алады Арайлым.
Олардың отбасылық фермерлік шаруашылығында бәрі жұмыла жұмыс жасайды.
Бір жыл бұрын отбасы жаңа трактор сатып алды. Заманауи техника еңбек өнімділігін арттырып, күнделікті жұмысты жеңілдетті.
– Жаңа техниканың арқасында біз көп нәрсеге үлгере бастадық. Жақында «ҚазАгроҚаржы» АҚ-нан жылдық 5%-бен жеңілдікті лизинг бағдарламасы бойынша екінші трактор сатып алуға өтінім бердік. Егер қолжетімді қаржыландыруды ескерсек, біз шаруашылықты сақтап қана қоймай, оны дамытуға да мүмкіндік алдық, – дейді ол.
Қазір ауылдарды дамытуға көп көңіл бөлінуде. Мемлекеттің қолдауы, әлеуметтік мәселелерге назар аудару, өмір сүру жағдайларының жақсаруы – осының бәрі жастардың туған жерінде тұрып, жұмыс істеуіне және ауыл өмірінде әлеуетті көруіне септігін тигізетіні сөзсіз.
– Шын мәнінде көптеген жастар ауылда тұрып, жұмыс істегісі келеді, бірақ баспанасыз және қолайлы жағдайсыз өте қиын. Ауылда тұрғын үй берсе, үлкен серпін болар еді, – дейді Арайлым. – Сондай-ақ мен қыздарға ауылдағы жұмыс пен техникадан қорықпаңыздар дегім келеді. Ауылда да даму үшін мүмкіндіктер бар. Бәрі де өз қолымызда.