"Жасанды интеллект — болашақ өркениетінің қозғаушы күші".

Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауынан үзінді берілген. Онда: «Еліміз білім экономикасына көшіп жатыр. Сондықтан, ғылым, білім және инновация саласын басқару тәсілдерін өзара байланыстыру өте маңызды» деп атап көрсетілген. Осы ой — қазіргі Қазақстан дамуының стратегиялық бағытын айқындайтын маңызды тұжырым. Бүгінгі жаһандану дәуірінде елдің қуаты табиғи ресурстармен ғана емес, ең алдымен адам капиталымен, яғни білімді, білікті, жаңашыл ұрпақпен өлшенеді. Білім экономикасына көшу — уақыт талабы. Бұл дегеніміз — жаңа технологиялар, цифрландыру, жасанды интеллект және ғылыми жетістіктер арқылы елдің бәсекеге қабілеттілігін арттыру. Ғылым, білім және инновация бір-бірімен тығыз байланыста дамығанда ғана нақты нәтиже береді. Егер ғылымда жаңалық ашылып, ол білім беру жүйесіне енгізілсе, ал инновация арқылы өндірісте қолданылса — сонда ғана экономиканың сапалы өсімі қамтамасыз етіледі. Басқару жүйесінің өзара үйлесімді болуы — тиімділіктің кепілі. Бұл жастарға сапалы білім алуға, ғалымдарға зерттеу жүргізуге, кәсіпкерлерге жаңа жобаларды іске асыруға кең мүмкіндік береді. Цифрлық трансформация мемлекеттік басқару саласын да жетілдіреді. Ашықтық, тиімділік, жеделдік — осының бәрі заманауи технологиялардың арқасында жүзеге асады. Жасанды интеллект дәуірінде тек білімді ұлт қана алға шығады. Білім беру жүйесін жаңғырту, ғылымды қолдау, стартап жобаларды дамыту — ел болашағына салынған инвестиция.
Білім экономикасына көшу — Қазақстанның стратегиялық таңдауы. Ғылым, білім және инновацияны өзара байланыстыру — тұрақты дамудың, технологиялық серпілістің және халықаралық бәсекеге қабілеттіліктің негізі. Бұл бағытта жасалған әр қадам — елдің жарқын болашағына бастайтын сенімді жол.