"Жолдау – тұрақты даму мен ұлттық жаңғырудың кепілі"

Қасым-Жомарт Тоқаевтың Жолдауы – қоғам дамуының жаңа нысанына бастайтын стратегиялық бағдар
Мемлекет басшысы Қасым-Жомарт Тоқаевтың Қазақстан халқына арнаған Жолдауы – елдің қоғамдық дамуының жаңа моделін қалыптастыруға бағытталған маңызды саяси-құқықтық құжат. Бұл Жолдауда қоғамның барлық саласын қамтитын түбегейлі өзгерістер ұсынылып, мемлекеттік басқарудың жаңа нысаны, азаматтық қоғамды дамыту және халықтың әл-ауқатын арттыру басты басымдық ретінде айқындалды. Президент өз Жолдауында «Әділетті Қазақстан» тұжырымдамасын қоғам дамуының негізгі өзегі ретінде ұсынды. Бұл – заң үстемдігіне негізделген, әрбір азаматтың құқығы мен еркіндігі қорғалатын, әлеуметтік әділдік пен тең мүмкіндіктер қамтамасыз етілген қоғам құруды көздейтін жаңа даму жолы. Қоғамның даму нысаны енді тек экономикалық өсіммен ғана емес, азаматтардың мемлекет басқару ісіне белсенді қатысуымен, ашықтық пен жауапкершілік қағидаттарының орнығуымен өлшенетін болды. Жолдауда қоғамды жаңғыртудың маңызды бағыты ретінде саяси реформалар ерекше атап өтілді. Мемлекеттік институттарды жаңарту, жергілікті өзін-өзі басқаруды күшейту, халықтың шешім қабылдау процесіне қатысу аясын кеңейту – қоғам дамуының демократиялық нысанын қалыптастыруға бағытталған нақты қадамдар. Бұл өзгерістер билік пен қоғам арасындағы сенімді арттырып, азаматтық белсенділіктің өсуіне жол ашады.
 Президент қоғам дамуының әлеуметтік нысанын нығайтуға да айрықша мән берді. Білім беру, денсаулық сақтау, әлеуметтік қолдау жүйелерін жетілдіру арқылы адам капиталының сапасын арттыру – ұзақ мерзімді тұрақты дамудың кепілі ретінде қарастырылды. Әлеуметтік әділдік қағидатын сақтау қоғамдағы тұрақтылық пен келісімді қамтамасыз етудің негізгі шарты екені атап өтілді.
Жолдауда цифрландыру мен инновацияға негізделген қоғам қалыптастыру да маңызды бағыт ретінде көрсетілді. Цифрлық технологияларды енгізу мемлекеттік қызметтердің сапасын арттырып қана қоймай, қоғамның ашықтығы мен тиімділігін қамтамасыз етеді. Бұл – заманауи, бәсекеге қабілетті қоғамның жаңа нысанына өту жолындағы маңызды қадам.