Balkhash Tour Fest-тің алғашқы күніне 35 мың қонақ жиналды
Балқаш көлінің жағалауында өтіп жатқан Balkhash Tour Fest – 2026 халықаралық фестивалінің алғашқы күні 35 мыңға жуық қонақты қабылдады. Ауқымды шараға Ресей, Қырғызстан, Түркия, Үндістан және басқа да елдерден келген туристер қатысып, белсенді демалыс, спорт, музыка мен саяхат сүйер қауым үшін бірегей мерекелік алаңға айналды. Фестиваль еліміздегі ең ірі туристік оқиғалардың бірі ретіндегі беделін тағы бір мәрте көрсетті.
Ұйымдастырушылар қонақтарға мазмұнды әрі әртүрлі бағдарлама әзірледі.
Фестиваль алаңында әр жастағы келушілерге арналған ойын-сауық түрлері мен спорттық белсенділіктер ұсынылып, әркім өз қызығушылығына сай бағытты таңдай алды.
Көпшілік назарын ерекше аударған нысандардың қатарында алып дженга, яркокросс, мас-рестлинг, жағажай волейболы және жасанды интеллект технологиялары ұсынылған интерактивті аймақ болды. Мұнда қонақтар робот-қақпашымен ойнап, заманауи технология мүмкіндіктерін тамашалады.
Фестивальдің арнайы қонақтарының бірі – танымал қазақстандық балуан Сергей Цырульников болды.
Ол шараның жоғары деңгейде ұйымдастырылғанын атап өтіп, мұндай жобалардың ішкі туризмді дамытуға, сондай-ақ Балқаш өңірінің табиғи байлығы мен туристік әлеуетін кеңінен танытуға зор ықпал ететінін айтты. Спортшы көрермендерге қазақтың айбарлы батырларының рухына арналған ерекше интерактивті шоуын ұсынды.
Фестиваль бағдарламасындағы маңызды оқиғалардың бірі – Халықаралық волонтерлер форумы болды. Оған Қазақстан, Түркия, Үндістан, Әзербайжан, Қырғызстан, Түрікменстан және Өзбекстан жастары қатысты.
Форум аясында еріктілер «Таза Қазақстан» ұлттық бастамасы аясындағы экологиялық акцияға қатысып, Балқаш көлінің жағалауын тазалауға атсалысты.
Сонымен қатар олар балқаштықтарға Балқаш өңірі табиғатының символы саналатын Тұран жолбарысының мүсінін сыйға тартты.
Фестивальдің алғашқы күні Балқаш тарихында алғаш рет ұйымдастырылған ауқымды дрон-шоумен есте қалды. Кешкі аспанға көтерілген 500 жарық дрон көл үстін түрлі көркем бейнелер мен әсерлі композицияларға толтырып, көрермендерге ерекше әсер сыйлады.
Balkhash Tour Fest – 2026 жалғасуда. Фестиваль қонақтары мен қала тұрғындарын алдағы күндері жаңа әсерлер, қызықты бағдарламалар мен жарқын тосынсыйлар күтеді.
