Өңірдің туризміндегі жаңа бағыт: «Индустриялық Қарағанды» маршруты іске қосылды

«Visit Karaganda» командасының ұйымдастыруымен «Индустриалды Қарағанды» атты ақпараттық тур өтті. Бұл жоба өнеркәсіптік және тарихи туризм бағытын дамытуға, Қарағанды облысының жаңа қырын ашуға бағытталды. Қарағанды облысы – тек табиғаты әсем өлке ғана емес, өндіріс пен индустрияның жүрегі. Сондықтан турдың мақсаты – аймақтың өндірістік әлеуетін, тарихи және мәдени мұрасын жаңа форматта көрсету. Турға туроператорлар, журналистер, блогерлер мен инфлюэнсерлер қатысты.

Маршрут Тұңғыш Президенттің тарихи-мәдени орталығынан (Теміртау қаласы) басталды. Мұнда қатысушылар аймақтың металлургия саласы және өнеркәсіп дамуы туралы мол мағлұмат алды.

Одан кейін қатысушылар Теміртау трамвайымен жол жүрді. Бұл – Қазақстанда трамвай жүйесі сақталған санаулы қалалардың бірі. Ең қызығы, бұл трамвайлар отандық QazTehna зауытында жасалған!

Келесі аялдама — Қысқы бақ (ботаникалық бақ). Мұнда түрлі экзотикалық өсімдіктер, оның ішінде пальмалар өсіп, ерекше табиғи атмосфера қалыптастырады.
Топ ары қарай шахта-музейге барып, көмір өндіру саласының тарихымен танысты. Қатысушылардың көбі алғаш рет шахтаға түсті — әсер ерекше болды.

Келесі нысан — «WEC TRADE» тұрмыстық химия зауыты. Мұнда күнделікті қолданыстағы отандық өнімдер шығарылады. Бұл – сапалы тауарлар мен мақтануға тұрарлық бренд.

Түскі ас табиғат аясында, орман белдеуінде өтті – бұл да ерекше атмосфера мен шабыт сыйлады. Тур әрі қарай «Tengri Tyres» шиналар зауытында жалғасты – бұл Қазақстандағы жалғыз шиналар өндірісі. Қатысушылар шикізаттан дайын өнімге дейінгі процесті, вулканизация мен протектор қалыптау кезеңдерін көрді.

Соңғы нүкте – «ҚарЛАГ» саяси қуғын-сүргін құрбандарының музейі, мұнда қатысушылар өткенге тағзым етіп, терең ойға батты.

Осылайша, Қарағанды облысында жаңа бағыттағы турмаршрут — «Индустриалды Қарағанды» жобасы іске қосылды. Бұл бағыт аймақтың өнеркәсіптік, тарихи және мәдени мұрасын жаңа деңгейде таныстыруға мүмкіндік береді.