«Таза Қазақстан»: Осакаров ауданында оқушыларға экологиялық жауапкершілік дәріптелді
Осакаров ауданындағы Әлихан Бөкейхан атындағы тірек мектебінде оқушыларға арналған интерактивті эковикторина ұйымдастырылып, қоршаған ортаға ұқыпты қарау мәдениетін қалыптастыруға бағытталған мазмұнды дәріс өткізілді. Білім ордасында өскелең ұрпақтың экологиялық санасын дамыту жүйелі әрі мақсатты түрде жүзеге асырылып келеді.
Іс-шара қонақтарын мектеп парламентінің мүшелері қарсы алып, экскурсовод ретінде оқу ордасында қолға алынған экологиялық бастамалар мен жобаларды таныстырды. Жас белсенділер «Таза Қазақстан» жалпыұлттық бастамасының қағидаттары мектеп қабырғасында нақты істер арқылы жүзеге асып жатқанын көрсетті.
Ерекше назар туған өлкенің экологиясына арналған балалар суреттерінің көрмесіне ауды. Оқушылар өз шығармашылығы арқылы елдің таза, жасыл әрі орнықты болашағын, табиғатпен үйлесімді өмір сүруге деген шынайы ұмтылысын бейнеледі.
Мектептің қысқы бағында директор Мара Ақмағамбетованың жетекшілігімен жүзеге асырылып жатқан «Қайта өңделетін шикізаттан жасалған балалар өнері» экологиялық жобасы таныстырылды. Қайта өңделетін материалдармен жұмыс арт-студияда да жалғасып, онда оқушылар пайдаланылған заттарды өңдеудің және креативті қайта қолданудың түрлі тәсілдерін меңгеруде.
Оқу орнында экологиялық мәдениеттің маңызды құрамдас бөлігі ретінде қалдықтарды бөлек жинау жүйесі енгізілген. Мектеп аумағында пластикке, қағазға және шыныға арналған арнайы контейнерлер орнатылып, қоқысты сұрыптау оқушылардың күнделікті дағдысына айналған.
Қонақтар фаблаб-зертхананың жұмысына да ерекше қызығушылық танытты. Мұнда лазерлік жабдықтарды қолдану арқылы дайындалған жобалар ұсынылды. Барлық жұмыстар туған өлкенің экологиясы мен өңірдің орнықты дамуына арналған — жел диірмендерінің үлгілерінен бастап болашақ ауыл шаруашылығына қатысты тұжырымдамаларға дейін.
Іс-шара мектептің акт залында қорытындыланып, оқушылар үшін интерактивті викторинамен ұштасқан танымдық дәріс өткізілді.
— Біздің мектеп экологиялық бастамаларға белсенді қатысады. Қалдықтарды қайта өңдеп, олардан түрлі бұйымдар жасаймыз, кейін мектеп парламенті сол жұмыстардың көрмесін ұйымдастырады. Экология тақырыбындағы сынып сағаттары мен дәрістер тұрақты түрде өтеді. Мұның бәрі оқушылардың экологиялық мәдениетін қалыптастыруға ықпал етеді, — деді 10 «Б» сынып оқушысы Алуа Серікбай.
Ал оның сыныптасы Әдемі Мұхамеджанова жүргізіліп жатқан жұмыстың практикалық маңызын атап өтті:
— Мектепте пластик, қағаз және шыныға арналған бөлек контейнерлер қойылған. Біз қалдықтарды сұрыптап, қайта өңдеуге жібереміз. Уақыт өте келе бұл қалыпты әрі пайдалы әдетке айналды, — деді ол.
Фото: Осакаров ауданының ішкі саясат бөлімі