ӨҢІРДІҢ ДАМУЫНЫҢ СТРАТЕГИЯЛЫҚ БАҒЫТТАРЫ НАЗАРДА

Қарағанды облысының әкімі облыстық мәслихат сессиясында баяндама жасады

2025 жылғы 2 қыркүйекте облыстық мәслихат сессиясында өңір басшысы Ермағанбет Бөлекпаев депутаттар алдында есеп беріп, Президент қойған міндеттердің орындалу барысы туралы баяндады. Ол ағымдағы жылдың 8 айындағы атқарылған жұмыстар туралы есеп ұсынды.
📌 Экономика және бюджет
Өңірдің өнеркәсіп көлемі 7%-ға, құрылыс – 25%-ға, көлік саласы – 17,7%-ға, ауыл шаруашылығы – 2,9%-ға өсті. Бюджетке 867,7 млрд теңге түсті, оның ішінде өзіндік кірістер – 384,4 млрд теңге. Қаражаттың жартысынан астамы әлеуметтік салаға – медицина, білім беру, халықты қолдауға бағытталды. Нақты экономика секторына 336,4 млрд теңге бөлінді.
📌 Өнеркәсіп және инвестициялар
Өңірдің өнеркәсіп құрылымында өңдеу секторы жетекші орын алады – жалпы көлемнің 76%-ы. Негізгі өсім драйвері – металлургия. Машина жасау 10,5%-ға өсіп, оның үлесі 13%-ға жетті. «Сарань» индустриялық аймағында жаңа өндірістер іске қосылып, бұл қалаға моноқала мәртебесінен шығуға мүмкіндік берді.
8 ай ішінде 644,7 млрд теңге инвестиция тартылып, 20 жоба іске қосылды, 2 мыңнан астам жұмыс орны құрылды. Жыл соңына дейін 29 жоба жүзеге асырылып, 2030 жылға дейін 4,5 трлн теңгеге 120 жоба іске қосу жоспарлануда.
📌 Шағын және орта бизнес, сауда
Бизнес саласында 235 мың адам жұмыс істейді – бұл әрбір екінші жұмысшы. ШОБ-ты қолдау субсидиялар, кепілдіктер және гранттар арқылы жүзеге асырылады. Жарты жыл қорытындысы бойынша кәсіпкерлерден түсетін салық түсімі 14%-ға артты. Өңірдегі сауда айналымы тұрақты өсіп келеді, жаңа супермаркеттер мен маркетплейстер ашылуда.
📌 Ауыл шаруашылығы
Ауыл шаруашылығы өнімі көлемі 219,2 млрд теңгеге жетті (+2,9%). Ет пен сүт өндірісі артты. 970 мың тонна астық, 373 мың тонна картоп және 75,5 мың тонна көкөніс жиналады деп күтілуде. Жаңа сүт фермалары, элеваторлар мен көкөніс қоймалары салынуда. Салаға салынған инвестиция көлемі 2,4 есе артты.
📌 Тұрғын үй және инфрақұрылым
8 айда 351,7 мың шаршы метр тұрғын үй салынды, жыл соңына дейін 548 мың шаршы метр енгізу жоспарланған. Қарағанды, Теміртау, Балқаш, Сарань және басқа да қалаларда сумен жабдықтау және инженерлік желілерді жаңарту жобалары жүзеге асырылуда. Халықты сумен қамту деңгейі 98,7%-ға жетті. Газдандыру жұмыстары белсенді жүріп жатыр – 5,6 мыңнан астам үй газға қосылды, жыл соңына дейін тағы 3 мың үй қосылады.
📌 Экология
Өнеркәсіптік кәсіпорындарды газдандыру басталды, нәтижесінде 2025 жылы шығарындылар көлемі 35,6 мың тоннаға азаяды. «Таза Қазақстан» акциясы аясында 5 мың гектардан астам аумақ тазартылып, 29 мыңнан астам ағаш отырғызылды.
📌 Көлік және жолдар
Өңірде 637 шақырым жол жөнделді. «Балқаш – Бурылбайтал», «Қарағанды – Қарқаралы» бағыттарындағы ірі жобалар аяқталуға жақын. «Достық – Мойынты» және «Мойынты – Қызылжар» теміржол бағыттары дамып келеді. Қарағанды мен Балқаш әуежайлары жаңғыртылуда, автобустар паркі жаңартылып жатыр.
📌 Әлеуметтік сала
Жұмыссыздық деңгейі 4% деңгейінде сақталуда – бұл елдегі ең төмен көрсеткіштердің бірі. 11 мыңға жуық жаңа жұмыс орны құрылды, аз қамтылған отбасылар мен мүмкіндігі шектеулі адамдарды қолдау бағдарламалары жүзеге асырылуда.
📌 Білім беру және денсаулық сақтау
Биыл 5 балабақша мен 6 мектеп ашылды, тағы 7 нысанның құрылысы жүргізілуде. Ауыл мектептері жаңғыртылып, заманауи жабдықтар сатып алынуда. Денсаулық сақтау саласында нысандар салынып, жөнделіп, техника сатып алынуда, жас мамандарға қолдау көрсетілуде.

📌 Спорт және бос уақыт
«Арт спорт» бағдарламасы бойынша 15 мыңға жуық бала секцияларға қатысуда. Қалалар мен аудандарда жаңа спорт кешендері, стадиондар мен бассейндер салынып жатыр.

📌 Халықпен жұмыс
Жыл басынан бері тұрғындармен 400-ден астам кездесу өткізіліп, 1600-ден астам өтініш қаралды. Негізгі мәселелер жол карталарына енгізіліп, бюджет жоспарлау аясында шешілетін болады.