Қарағанды облысында Қазақстанның Еңбек Ері Георгий Прокоп мерейтойымен құттықтады
Қарағанды облысында белгілі аграршы, «Шахтёрское» элиталық тұқым шаруашылығының жетекшісі, Қазақстанның Еңбек Ері Георгий Прокоптың 75 жылдық мерейтойы аталып өтті. Оны облыс әкімі Ермағанбет Бөлекпаев құттықтап, Президент атынан Алғыс хат табыс етті.
Прокоп – ауыл шаруашылығында жарты ғасырдан астам еңбек етіп, саланың дамуына және елдің азық-түлік қауіпсіздігіне зор үлес қосқан тұлға. Оның жетекшілігіндегі шаруашылық облыстағы үздіктердің бірі саналады. Ол «Құрмет», «Парасат», «Отан», «Еңбек даңқы» ордендерімен марапатталған және өткен жылы «Қазақстанның Еңбек Ері» атағын иеленген.
Биыл «Шахтёрское» шаруашылығы 77 мың тонна астық және 21,5 мың тонна картоп өндіріп, рекордтық нәтиже көрсетті.
Георгий Прокоп еңбекқорлық пен жерге деген сүйіспеншілікті өмірлік ұстаным етіп, жастарға «қиындықтардан қорықпай, табандылықпен еңбектену керек» деген кеңес берді.
Әріптестері оны жаңашыл, іскер және табанды жетекші ретінде сипаттады. Прокоп 1950 жылы Нұра ауданының Киевка ауылында туған, Целиноград ауыл шаруашылығы институтының түлегі.