БҚО-да жылыту маусымына дайындық аясында 328 шақырымнан астам электр желісі және 12 шақырым жылу желісі жөнделеді

Қазақстан Республикасы Энергетика министрлігі Мемлекеттік энергетикалық қадағалау және бақылау комитеті Төрағасының орынбасары Жалғас Шөгелбаев Батыс Қазақстан облысына жұмыс сапарымен барып, өңірдің энергетика нысандарын 2026–2027 жылдардағы күзгі-қысқы кезеңге дайындау мәселелері бойынша кеңес өткізді.

Кеңеске өңірдегі энергетикалық кәсіпорындардың басшылары мен өкілдері қатысты.

Жиын барысында жөндеу науқанының іске асырылу барысы, энергетикалық инфрақұрылымның қысқы жүктемелерге дайындығы, жоспарланған іс-шаралардың орындалуы, сондай-ақ тұтынушыларды сенімді әрі үздіксіз энергиямен қамтамасыз ету мәселелері қаралды.

Алдағы жылыту маусымына дайындық аясында облыста 328,7 км электр беру желілерін, сондай-ақ 19 қосалқы станция мен 70 тарату пункттері және трансформаторлық қосалқы станцияларды жөндеу жоспарланған.

Бүгінгі таңда 70,8 км электр беру желісі жөнделді, бұл жылдық жоспардың 21,5%-ын құрайды. 

Сондай-ақ өңірде жылу желілерін реконструкциялау және күрделі жөндеу жұмыстары жүргізілуде. Жалпы 12,4 км жылу желісін жаңарту көзделген, оның ішінде бүгінгі күні 3,4 км немесе жоспардың 27%-ы орындалды. Сонымен қатар, Ұлттық жоба аясында 8,1 км жылу желісін реконструкциялау жұмыстары жүзеге асырылуда.

«Жайықжылуқуат» АҚ жылу электр орталығында жөндеу науқаны аясында 1 газ турбиналық қондырғы мен 1 қазандыққа күрделі жөндеу жүргізу жоспарланған. Бүгінгі таңда газ турбиналық қондырғының жөндеу жұмыстары аяқталды, ал №3 қазандықтағы жөндеу жұмыстары жалғасуда.

Кеңес қорытындысы бойынша жөндеу іс-шараларын белгіленген мерзімде орындауды, жұмыстардың сапасына ерекше назар аударуды және алдағы жылыту маусымында энергетикалық нысандардың сенімді жұмысын қамтамасыз ету тапсырылды.