Энергетика министрлігінде Конституцияның 30 жылдығына орай үздік мамандар марапатталды

Астана. 2025 жылғы 29 тамыз — ҚР Энергетика министрлігінде ел Конституциясының 30 жылдығына арналған салтанатты іс-шара өтті. Шара барысында энергетика саласының үздік қызметкерлері марапатталып, олардың ел экономикасына қосқан еңбегі атап өтілді.
Салтанатты жиында Энергетика министрі Ерлан Ақкенженов, Конституция тек мемлекеттік құрылымның емес, сонымен қатар елдің экономикалық қуатының негізі екенін айтып, бұл тұрғыда энергетика саласының орны ерекше екенін тілге тиек етті.
«Конституция – біздің мемлекеттілігіміз бен экономикалық қуатымыздың іргетасы. Ал энергетика саласы – осы экономиканың тірегі. Ол өнеркәсіптің, әлеуметтік саланың дамуына және халықтың әл-ауқатына тікелей әсер етеді. Осы орайда әрбір ірі жобаның, өндіру көрсеткіші мен киловатт қуаттың артында отандастарымыздың ошағына жылу мен жарық жеткізіп отырған нақты адамдар – өз ісінің кәсіби мамандары тұрғанын ұмытпауымыз керек. Бүгін біз сол жандардың еңбегін бағалап, құрметтейміз», – деді министр Ерлан Ақкенженов.

Салтанатты шарада саланың дамуына зор үлес қосқан қызметкерлер жоғары марапаттарға ие болды.
Қазақстан Республикасы Президентінің Жарлығына сәйкес, мемлекеттілікті нығайту және ел экономикасын дамытуға қосқан елеулі үлесі үшін «Қазақстан Республикасының Конституциясына 30 жыл» мерейтойлық медалімен:
Гүлзина Анасова – Отын-энергетика кешенін цифрландыру басқармасының басшысы;
Дәулет Арықбаев – Мұнай тасымалдау және өңдеу департаментінің директоры;
Бибігүл Рахымберлина – Атомдық және энергетикалық қадағалау мен бақылау комитеті Қаржы және мемлекеттік сатып алу басқармасының басшысы;
Ботагөз Советқызы – Әкімшілік жұмысы департаментінің директоры марапатталды.
Сондай-ақ, мұнай-газ саласын дамытуға қосқан үлесі және кәсіби шеберлігі үшін бірқатар қызметкер министрліктің «Мұнай-газ кешенін дамытуға қосқан үлесі үшін» медалімен марапатталды.
Іс-шара соңында министр сала мамандарына адал еңбектері мен ел энергетикасының дамуына қосқан зор үлесі үшін алғыс білдірді.