Қазақстан СІМ-де Наурыз мерекесі аталып өтті

Астана, 2025 жылғы 20 наурыз – Қазақстан Республикасы Сыртқы істер министрлігінде еліміздің ең маңызды және жарқын мерекелерінің бірі – Наурызды мерекелеуге арналған салтанатты іс-шара өтті. Іс-шараға сыртқы саяси ведомствосының басшылығы мен қызметкерлері қатысты.

Наурыз – бейбітшілік пен келісім құндылықтарына негізделген жаңаруды, жаңғыруды, өркендеу мен бірлікті бейнелейді. Бұл мереке рухани бірлікке деген ұмтылысты ғана емес, сонымен бірге мықты және гүлденген мемлекет құрудағы бірлескен күш-жігердің маңыздылығын еске салады.

СІМ басшылығы министрлік ұжымын құттықтап, әлемдік қауымдастық мойындаған, ЮНЕСКО-ның Материалдық емес мәдени мұра тізіміне енгізілген және БҰҰ Бас Ассамблеясының қарарымен қабылданған осы көктемгі мерекенің ерекше мәнін атап өтті.

Іс-шара соңында ұлттық дәстүрлерді сақтау және насихаттау СІМ-нің мәдени дипломатияны ілгерілетудегі қызметінің маңызды бөлігі екеніне назар аударылды. Наурыз ұрпақтар бірлігі мен сабақтастығының символы ретінде халықаралық байланыстарды нығайтуда, ынтымақтастықты дамытуда және әлемдік аренада еліміздің бейбіт бастамаларын ілгерілетуде маңызды рөл атқарады.