Қазақстан мен Ресей геология саласында әріптестікті күшейтеді

Бүгін Мәскеуде ҚР Экология, геология және табиғи ресурстар министрі Мағзұм Мырзағалиев пен Ресей Федерациясының табиғи ресурстар және экология министрі Александр Козлов геология саласындағы әріптестік туралы Меморандумға қол қойды.

Келісімге сәйкес, Тараптар минералдық ресурстар, аймақтық геология салаларында және геологиялық карталар әзірлеу бойынша өзара экономикалық қатынасты күшейтпек. Бұдан бөлек, екі елдің мемлекеттік және жекеменшік ұйымдары, геологиялық барлаумен айналысатын компаниялары арасындағы байланыс реттеледі.

Сонымен қатар, Тараптар түрлі пайдалы қазбалар кен орындарын іздеу және бағалау үшін бірге геологиялық, геофизикалық зерттеулер жүргізеді. Бұған жер асты суларын табу, түрлі масштабтағы геологиялық түсірілімдер жасау, минералдық шикізаттың кен орындарын табуға бағытталған геохимиялық, геофизикалық зерттеу әдістерін қолдану бойынша да жұмыстар кіреді.

Мағзұм Мырзағалиевтің сөзінше, Меморандум Қазақстан мен Ресейдің геология саласын дамытуға кең мүмкіндіктер ашып, геологиялық компаниялар арасында ұзақ мерзімді қарым-қатынас орнатуға ықпал етеді.

«Қол қойылған құжат қос елдің геология саласындағы бірлесе әрекет ету потенциалын ұлғайта түседі. Бұл бағыттағы шаралар консолидациясы зерттеулердің тиімділігін арттырып, геология саласында жаңа мүмкіндіктер ашатынына сенімдімін»,- деп атап өтті Қазақстанның экология министрі.