Біздің өлкеміздің зерттелмеген байлығы
Қостанай облысының жер қойнауы жоғары сапалы кендердің бірегей қорлары бар кен орындарында шоғырланған түрлі пайдалы қазбаларға бай. Оларға темір, алюминий, мырыш, никель-кобальт, асбест кендері, қоңыр көмір, алтын және басқалары жатады. Аумақты зерттеу тоқтамайды. Тұрақты іздестіру-барлау жұмыстарының нәтижесінде олардың қорлары ұлғаяды.
Қостанай облысының аумағында «Жер қойнауын ұтымды және кешенді пайдалануды қамтамасыз ету және Қазақстан Республикасы аумағының геологиялық зерделенуін арттыру» бағдарламасы шеңберінде N-41-ХХІХ, ХХХ (жалпы ауданы 9962,00 км2) парақтар алаңында «Костанайская поисково-съемочная экспедиция» ЖШС геологиялық барлау компаниясымен «1:200 000 масштабтағы терең геологиялық картаға түсіру N-41-ХХІХ, ХХХ парақтар алаңындағы түсті және қара металдардың болжамды ресурстарын бағалаумен (келісімшарттық аумақтарды қоспағанда), Қостанай облысы» объектісі бойынша Р2, Р3 санаттары бойынша пайдалы қазбалардың болжамды ресурстарын бағалау және перспективалы алаңдарды анықтаумен жұмыстар жүргізілуде.
Жұмыстар «Солтүстікқазжерқойнауы» ӨД мен «Костанайская поисково-съемочная экспедиция» ЖШС арасындағы Шартқа сәйкес республикалық бюджет қаражаты есебінен жүргізіледі.
Әкімшілік жағынан жұмыс ауданы Қостанай облысының Алтынсарин, Қарасу, Сарыкөл, Қостанай және Әулиекөл аудандарына жатады.
1:200 000 (ГГК-200) масштабындағы терең геологиялық картаға түсіру-бұл пайдалы қазбалар кен орындарын анықтауға перспективалы, тереңдікте жатқан тау жыныстарының кешендері, жекелеген геологиялық денелер мен құрылымдар объектісі болып табылатын аймақтық геологиялық түсірілім жұмыстарының бір түрі.
Бұл жұмыстар бұрын аудан шегінде орындалған геологиялық, геофизикалық, аэро - және ғарыштық түсірілімдердің, іздестіру және ғылыми-зерттеу жұмыстарының деректерін жинаумен, жинақтаумен және талдаумен сүйемелденетін болады.
Қойылған міндеттер іздеу жұмыстарының алаңын геологиялық зерттеу, карталық бағаналы ұңғымаларды бұрғылаумен зерттеулер кешенін жүргізу, геофизикалық және зертханалық зерттеулер арқылы шешіледі.
Жүргізілген жұмыстардың нәтижелері бойынша кен аудандарының, тораптардың, алқаптардың орналасу алаңдары бөлініп, контурланатын болады, олардың болжамды ресурстары бағаланады, іздеу жұмыстарын қою үшін перспективалы объектілер айқындалады, сондай-ақ карталар кешенімен есеп жасалады.
Қостанай облысының жер қойнауының әлеуеті таусылған жоқ. Жүргізілген жұмыстардың нәтижелері бойынша оларды пайдалануға тарту үшін перспективалы жаңа өнеркәсіптік кен орындары анықталатын болады.
«Солтүстікқазжерқойнауы» ӨД
Қостанай өңірлік инспекциясы