Жоғары аудиторлық палата тексеру комиссиялары үшін шоғырландырылған қаржылық есептілік аудиті бойынша семинар өткізді

ҚР Жоғары аудиторлық палатасында Палата мүшесі Р. Нұрпейісовтың басшылығымен республикалық және жергілікті бюджеттің шоғырландырылған қаржылық есептілігінің аудиті бойынша семинар өтті. Оған облыстардың, Астана, Алматы және Шымкент қалаларының тексеру комиссияларының 104 қызметкері қатысты.

Семинарда аудит жүргізудің әдіснамасы, практикалық тәсілдері мен өзекті мәселелері қаралды.

Талқылау барысында шоғырландырылған қаржылық есептілікті жасау тәртібіне, бухгалтерлік баланста салықтық және салықтық емес түсімдерді, олар бойынша дебиторлық және кредиторлық берешектерді көрсетуге, сондай-ақ шоғырландырылған қаржылық есептілік аудитін жоспарлауға және аудиторлық пікір жасау кезінде маңыздылық деңгейін айқындауға қатысты мәселелер қозғалды.

Семинар қорытындысы бойынша Жоғары аудиторлық палата тексеру комиссияларына қозғалған проблемалық мәселелер бойынша түсініктемелер жібереді.