Қазақстан Даму Банкінің адал қарыз алушылары өздерінің несие шарттарын жақсарта алады  

ҚР Жоғары аудиторлық палатасының нұсқамасы бойынша «Қазақстанның Даму Банкі» АҚ-ның ішкі құжаттарына қарыз алушылардың құқықтары мен мүдделерін қорғауға бағытталған маңызды өзгерістер енгізілді.
 
Жоғары аудиторлық палата бұған дейін «Бәйтерек» холдингі мен оның еншілес ұйымдарында борышты басқару тиімділігіне аудит жүргізді. Аудит барысында «ҚДБ» АҚ-ның кредиттік желілер ашу туралы шарттарында қарыз алушы өз кредиттік рейтингін жақсартқан жағдайда оның анағұрлым қолайлы шарттар беруді сұрау құқығы жоқ екені анықталды. Бұл құқық «Қазақстан Республикасындағы Банктер және банк қызметі туралы» Заңда көзделген.
 
Осыған байланысты Банк басшылығына:

• кредиттік желіні ашу туралы шарттың үлгілік нысанына өзгерістер енгізу;
• қарыз алушының кредиттік рейтингі көтерілген жағдайда оның несие шарттарын жақсартуға бастама жасау құқығын бекіту;
• аталған құқықты іске асыру және ол бойынша шешімдер қабылдау тәртібін Банктің ішкі құжаттарында айқындау тапсырылды.

Нәтижесінде қажетті түзетулер Банктің кредит комитетінің шешімімен бекітілді. Бұдан бөлек, Директорлар кеңесінің шешімімен «Қазақстанның Даму Банкі» АҚ-ның қаржылық тәуекелдерін басқару қағидаларына өзгерістер енгізілді.

Қабылданған шаралар несие беру икемділігін арттыруға, адал клиенттердің қаржылық жүктемесін азайтуға, әділ және бәсекеге қабілетті шарттарды қамтамасыз етуге мүмкіндік береді. Енді қарыз алушылар өздерінің төлем қабілеттілігін арттыруға мүдделі, ал Банк клиенттердің бейілділігін нығайту үшін жаңа құралға ие болады.
 
Мемлекеттік аудит қорытындылары бойынша берілген ұсынымдар мен тапсырмалардың орындалуы Жоғары аудиторлық палатаның бақылауында.