Энергоминде сыбайлас жемқорлыққа қарсы сараптама бойынша семинар өтті

Энергетика министрлігінің қызметкерлеріне «Qosyl» платформасында Қазақстан Республикасы Әділет министрлігінің Заңнама және құқықтық ақпарат институтымен бірлесіп онлайн-семинар өткізілді.

«Сыбайлас жемқорлыққа қарсы сараптама» тақырыбындағы семинар барысында қатысушылар нормативтік құқықтық актілер мен олардың жобаларына сыбайлас жемқорлыққа қарсы сараптама жүргізудің негізгі тәсілдері мен талаптарымен танысты.

Іс-шараның спикері әрі үйлестірушісі Әділет министрлігінің Заңнама және құқықтық ақпарат институтының өкілі Айгүл Нұрланова болды.

Кездесу барысында сыбайлас жемқорлық тәуекелдерін туындататын нормаларды анықтау және олардың алдын алу, сондай-ақ мемлекеттік қызметшілердің нормативтік реттеудің сапасын қамтамасыз етудегі және сыбайлас жемқорлыққа қарсы заңнаманы сақтаудағы рөліне қатысты практикалық мәселелер қаралды.

Семинар ашық диалог форматында өтті. Энергетика министрлігінің қызметкерлері өздерін қызықтырған сұрақтарды қойып, қаралған тақырыптар бойынша түсіндірмелер алды.

Осындай оқыту іс-шараларын өткізу мемлекеттік қызметшілердің құқықтық сауаттылығын арттыруға, сыбайлас жемқорлыққа қарсы мәдениетті қалыптастыруға және мемлекеттік органдардағы профилактикалық жұмысты жетілдіруге ықпал етеді.