Қазақстанда кадрларды даярлау ЖЭО-ны жаңғырту және цифрлық желілерді дамытудың нақты міндеттеріне бейімделеді

Алматы — Ғұмарбек Дәукеев атындағы Алматы энергетика және байланыс университетінің базасында Энергетика жөніндегі индустриялық кеңестің екінші отырысы өтті. Кездесу Мемлекет басшысының тапсырмаларын іске асыруға және «Көмір генерациясын дамыту» ұлттық жобасын талқылауға арналды.
ҚР Энергетика вице-министрі Сұңғат Есімхановтың төрағалығымен өткен отырысқа бейінді министрлік басшылығы, ірі энергетикалық холдингтердің топ-менеджменті және еліміздің жетекші ғалымдары қатысты.
Қабылданған жоба еліміздегі көмір генерациясын дамытудың алдағы бес жылдық кезеңін қамтиды. Ол көмір генерациясын дамытудың таза технологияларын қамтамасыз етуге, сондай-ақ саланың бейінді мамандарын даярлау сапасына серпін беруге бағытталған. Цифрлық инфрақұрылым мен есептеу қуаттарының жедел өсуі энергетика саласынан тек көлемді арттыруды ғана емес, сонымен қатар терең технологиялық трансформацияны талап етеді.
Вице-министр АЭжБУ-дың техникалық базасымен танысты. Делегацияға автоматтандыру және зияткерлік жүйелер саласындағы зертханалық әзірлемелер ұсынылды, олар импортты алмастыруға және ұлттық желілердің энергия тиімділігін арттыруға бағытталған. Технологиялық блок аясында сарапшылар саланы 2030 жылға дейін дамыту стратегиясын талқылады: «таза көмір» технологиялары - шығарындыларды азайту мақсатында, жасанды интеллект - энергетикадағы предиктивті талдау үшін және Smart Power Grid - желілерді басқарудың цифрлық жүйелері.
Ұлттық жобаны іске асыру аясында адами капиталды дамытуға ерекше назар аударылды. Қатысушылар атап өткендей: ЖЭО-ларды технологиялық жаңғыртудың табыстылығы мен экологиялық стандарттарды енгізу тікелей персоналдың біліктілігіне байланысты. Ұлттық жоба жаңа буын инженерлерін оқытуды ғана емес, сонымен қатар жұмыс істеп тұрған кадрларды ауқымды қайта даярлауды да қарастырады.
Бұл икемді білім беру бағдарламалары мен құзыреттілік орталықтарын құруды көздейді, онда практик-мамандар цифрлық сервистермен және заманауи декарбонизация жүйелерімен жұмыс істеуді меңгере алады. Осы стратегияны және ғылым мен индустрия арасындағы синергияның маңыздылығын талқылауға еліміздің жетекші жоғары оқу орындарының өкілдері қатысты: АЭжБУ, әл-Фараби атындағы ҚазҰУ, Әбілқас Сағынов атындағы ҚарТУ, Satbayev University және Toraighyrov University.
Кеңес жұмысы Ұлттық жобаның міндеттерін білім беру және ғылыми орта ресурстарымен үндестіруге мүмкіндік берді. Кездесудің негізгі нәтижесі — ЖЭО-ларды технологиялық жаңғырту және цифрлық желілерді дамытудың нақты сұраныстарына сәйкес кадрларды даярлау мен қайта даярлау жүйесін құру туралы уағдаластық болды.
Энергетика министрлігінің, салалық холдингтер мен жоғары оқу орындары қоғамдастығының өзара іс-қимылы еліміздің энергетикалық қауіпсіздігін қамтамасыз етудің және 2030 жылға дейінгі Стратегияны табысты іске асырудың негізіне айналады.