Хьюстондағы CERAWeek форумында Ерлан Ақкенженов АҚШ Энергетика министрі Кристофер Райтпен кездесті
CERAWeek халықаралық конференциясы аясында Хьюстон қаласында Қазақстан Республикасының Энергетика министрі Ерлан Ақкенженов АҚШ Энергетика министрі Кристофер Райтпен екіжақты кездесу өткізді.
Келіссөздердің негізгі тақырыптары – жаһандық энергетикалық қауіпсіздікті қамтамасыз ету, баламалы экспорттық бағыттарды дамыту және инвестициялық ынтымақтастықты нығайту болды.
Тараптар мұнай-газ саласындағы 32 жылдық стратегиялық әріптестіктің маңызын атап өтті. Қазақстанның энергетика секторына америкалық инвестициялар көлемі 60 миллиард доллардан асты. ExxonMobil және Chevron корпорациялары елдегі ең ірі жобалар – Теңіз, Қарашығанақ және Қашаған кен орындарын іске асырудағы негізгі серіктестер болып табылады. Бұл жобалар Қазақстан мұнайының шамамен 70%-ын өндіреді және америкалық ірі компаниялардың жаһандық өндірісінде маңызды орын алады. Ерлан Ақкенженов аталған активтерді ұзақ мерзімді дамыту және өндірістік қуаттарды арттыру үшін тұрақты жағдай қалыптастыруға мемлекеттің бейілділігін білдірді.
Министрлер логистика мәселелеріне және энергия тасымалдаушыларды әлемдік нарықтарға үздіксіз жеткізу кепілдіктеріне ерекше назар аударды. Каспий құбыр консорциумы негізгі экспорттық бағыт ретінде атап өтілді – ол әлемдік мұнай ұсынысының шамамен 2%-ын тасымалдайды. Қазақстан тарапы шикізат транзитінің сенімділігін қамтамасыз ету үшін барлық қатысушылармен прагматикалық диалогқа дайын екенін растады. Сондай-ақ тараптар құбырдың санкцияларға ілікпеу мәртебесін сақтау бойынша бірлескен жұмысты оң бағалады.
Сонымен қатар Қазақстан экспорт бағыттарын әртараптандыруды белсенді түрде жалғастыруда. Атап айтқанда, Транскаспий халықаралық көлік бағыты мен Баку–Тбилиси–Джейхан жүйесін дамыту мәселелері талқыланды. Жақын перспективада бұл бағыт бойынша тасымалдау көлемін жылына 2,1 млн тоннаға дейін жеткізу жоспарлануда. Министр Каспий теңізінің транзиттік әлеуетін тиімді пайдалану үшін америкалық инвесторлармен бірлесіп жұмыс істеуге дайын екенін білдірді.
Кездесу қорытындысында Ерлан Ақкенженов Қазақстанның табиғи ресурстарының әлеуеті жоғары екенін атап өтіп, технологиялық әріптестікті тереңдетуге ашық екенін жеткізді. Тараптардың үйлесімді іс-қимылы мен озық тәжірибе алмасуы өзара сенім мен прагматизм негізінде екі елдің экономикалық өсімін нығайтуға мүмкіндік береді.
Ерлан Ақкенженов АҚШ Мемлекеттік хатшысының көмекшісі Калеб Оррмен ынтымақтастық мәселелерін талқылады
АҚШ-қа жұмыс сапары аясында ҚР Энергетика министрі Ерлан Ақкенженов АҚШ Мемлекеттік хатшысының көмекшісі Калеб Оррмен кездесу өткізді.
Келіссөздер барысында тараптар екіжақты энергетикалық серіктестіктің қазіргі жағдайын талқылады. Кездесуге қатысушылар Қазақстанның мұнай-газ секторындағы американдық инвестициялар мен технологиялардың айтарлықтай үлесін атап өтті: республикадағы көмірсутектер өндірісінің жалпы көлемінің шамамен жартысы АҚШ компанияларына тиесілі.
Әлемдік нарықтарға энергия ресурстарын жеткізудің тұрақтылығы мен болжамдылығы мәселелеріне ерекше назар аударылды. Ерлан Ақкенженов Каспий құбыр консорциумының қазақстандық мұнайдың үздіксіз экспортын қамтамасыз ететін көпұлтты актив ретіндегі стратегиялық маңыздылығын атап өтті. Министр аталған бағыттың жұмысын санкциялық шектеулерден тыс штаттық режимде сақтауға мүмкіндік берген американдық тараптың сындарлы ұстанымын оң бағалады.
Кездесу соңында тараптар экспорттық бағыттарды дамыту, атап айтқанда Транскаспий халықаралық көлік бағытын дамыту бойынша қадамдарды қарастырды. Сондай-ақ американдық компаниялардың жаңа инфрақұрылымдық жобаларды іске асыруға, соның ішінде Қазақстанда төртінші мұнай өңдеу зауытын салу перспективасына қатысу мүмкіндігі талқыланды.
Ерлан Ақкенженов Қазақстан энергия ресурстарын жауапты әрі болжамды жеткізуші рөлін атқаруды жалғастыратынын, ал екі елдің бейінді ведомстволары арасындағы одан арғы үйлестіру жаһандық нарықтың тұрақтылығын қолдауға көмектесетінін атап өтті.