Жаңа мұржа, қосалқы станция және жылу пункті: «ПАВЛОДАРЭНЕРГО» өңір инфрақұрылымын жаңғыртуда

Бүгін «ПАВЛОДАРЭНЕРГО» АҚ өзінің 60 жылдық мерейтойын атап өтуде. Алпыс жыл ішінде компания өңірдің бөлінген энергетикалық нысандарын біріктіріп, Павлодар аймағын электр және жылу энергиясымен қамтамасыз ететін қуатты кешенге айналды. Бүгінде кәсіпорын 600 мыңнан астам тұрғын мен шамамен 13 мың заңды тұлғаға жарық пен жылу жеткізеді.

Соңғы жылдары компания инфрақұрылымды жаңғырту және заманауи технологияларды енгізу бағытында ауқымды жобаларды табысты жүзеге асырды. 2022 жылы Павлодар ЖЭО-3-те жаңа темірбетон түтін мұржасының құрылысы аяқталды, 2023 жылы Екібастұз ЖЭО мен жылу желілерінде кең көлемді жөндеу жұмыстары жүргізілді, ал өткен жылы «Солтүстік қалалық» қосалқы станциясы, ЖЭО-3-тің жаңа түтін мұржасы және №73 орталық жылу пункті пайдалануға берілді.

Өндірістік процестерді автоматтандыру мен цифрландыруға ерекше назар аударылуда. Павлодар ЖЭО-3-тің барлық қазан агрегаттарына автоматтандырылған басқару жүйелері орнатылып, бұл жабдықтардың жұмыс режимін оңтайландыруға және станцияның жалпы сенімділігін арттыруға мүмкіндік берді.

Инфрақұрылымды жаңарту – елдің энергетикалық жүйесінің сенімділігі мен тұрақтылығын қамтамасыз етудегі маңызды бағыттың бірі. Биыл Қазақстандағы электр станцияларында 10 энергия блогына, 63 қазан мен 39 турбинаға күрделі жөндеу жоспарланған. Сондай-ақ 17 мың км электр желісі жөнделіп, 400-ден астам қосалқы станция жаңартылды. 323 км жылу желілерін жаңғырту және күрделі жөндеу толық көлемде аяқталды.