Энергетика министрі ұжымға жаңа вице-министр Санжар Жаркешовті таныстырды

Бүгін ҚР Энергетика министрлігінде жаңа вице-министр Санжар Жаркешов ұжымға таныстырылды. Министр Ерлан Ақкенженов оның халықаралық тәжірибесін атап өтіп, жаңа басшының кәсіби білімі саланың дамуына елеулі үлес қосатынына сенім білдірді.

Санжар Жаркешов Қарағанды облысының тумасы. Ол Т. Рысқұлов атындағы Қазақ экономикалық университетін және Техас университетін (АҚШ) тәмамдаған. Еңбек жолын АҚШ-тағы Мұнай және геожүйелік инжиниринг орталығында бастаған. Кейін ExxonMobil компаниясында инженер және жоба жетекшісі болып жұмыс істеп, Қазақстан, АҚШ, Ирак және Ресейдегі кен орындарын игерумен айналысқан.

Одан кейін Merlin ERD және McKinsey & Company секілді халықаралық компанияларда басшылық және сарапшылық қызметтер атқарып, Еуропа, Азия және Америкадағы жобаларға қатысқан. Қазақстанда Экология, геология және табиғи ресурстар вице-министрі болып жұмыс істеді. 2022 жылдан бастап ұлттық QazaqGaz компаниясын басқарды.