Қазақстанда инвесторлар есебінен әлеуметтік жобаларға 10 миллион доллардан астам қаражат бөлу жоспарлануда

Энергетика министрлігі 1997 жылғы 18 қарашадағы Қарашығанақ мұнай-газ конденсаты кен орны мердігерлік учаскесінің өнімін бөлу туралы түпкілікті келісім (бұдан әрі – ӨБТК) шеңберінде қосымша қаржы қаражатын бөлу туралы Үкімет қаулысының жобасын дайындады, деп хабарлайды ҚР ЭМ Баспасөз қызметі.

ӨБТК шеңберінде Батыс Қазақстан облысындағы әлеуметтік және инфрақұрылымдық жобаларға 10 040 126 доллар (он миллион 40 мың 126 доллар) мөлшерінде қосымша қаражат бөлу ұсынылды.

Атап айтқанда, Батыс Қазақстан облысы Бөрлі ауданы Ақсай қаласының ауруханасында шұғыл медициналық ден қоюды (оқыту, консультациялық қызмет көрсету және персоналға арналған шығыстарды қоса алғанда) жаңғырту, мемлекеттік колледж базасында кәсіби оқу орталығын құру ұсынылды. Сондай-ақ, БҚО Бөрлі ауданы Аралтал ауылында жерді қалпына келтіруге және жауын-шашын суларын сорғыту жүйесін орнатуға қаражат бөлу мәселесі қарастырылуда.

Жобалар тізбесі Батыс Қазақстан облысы әкімдігінің ұсынысы бойынша жасалды.

Үкімет қаулысының жобасы «Ашық НҚА» порталында жарияланды, жария талқылау ағымдағы жылдың 5 қазанына дейін жалғасады.

Сурет Inbusiness.kz сайтынан