С. Шәпкенов «Nur Otan» партиясының қоғамдық қабылдау бөлмесінде азаматтарды қабылдады

ҚР Еңбек және халықты әлеуметтік қорғау министрі Серік Шәпкенов «Nur Otan» партиясының Республикалық қоғамдық қабылдау бөлмесінде онлайн қабылдау өткізді. Қабылдау барысында ҚР Еңбекминінің басшысы 7 азаматтың мәселесін қарады.

Министрге көмек және кеңес алу үшін Нұр-Сұлтан және Шымкент қалаларының, сондай-ақ Түркістан облысының тұрғындары жүгінді.

Қабылдау барысында мүгедектігі бар адамдарға қолдау көрсету, оның ішінде мүгедектік тобын белгілеу, төлемдер тағайындау және оңалтудың техникалық құралдарымен қамтамасыз ету мәселелері қаралды. Сондай-ақ, азаматтардың еңбекақысын төлемеу, материалдық көмек көрсету және «Күміс алқа» төсбелгісін алмау проблемалары қаралды.

Азаматтардың өтініштері мен ұсыныстарын тыңдаған Серік Шәпкенов олардың өтініштері бойынша егжей-тегжейлі жауаптар берді, ал қарауға қосымша уақытты қажет ететін мәселелер бойынша ҚР Еңбекминінің тиісті департаменттеріне өз құзыреті шеңберінде оларды шешуге көмек көрсетуге тапсырма берді.