2021 жылы мүгедектігі бар адамдар Әлеуметтік қызметтер порталы арқылы 230 мыңнан астам қызмет алды

2021 жылы мүгедектігі бар адамдар Әлеуметтік қызметтер порталы арқылы 230 мыңнан астам қызмет алды

Ағымдағы жылдың басынан бастап 158 мыңнан астам мүгедектігі бар адам Әлеуметтік қызметтер порталы (бұдан әрі – Портал) арқылы оңалтудың техникалық құралдарын (бұдан әрі – ОТҚ), 6 мыңнан астамы ымдау тілі қызметтерін, 31 мыңнан астамы жеке көмекшінің қызметтерін, 40 мыңға жуығы санаторлық-курорттық емдеу алды және 131 мыңнан астам адам кепілдік берілген әлеуметтік топтамаларға (бұдан әрі – әлеуметтік топтама) тапсырыс ресімдеді.

Портал мүгедектігі бар адамдарға оңалтудың техникалық құралдары мен қызметтерін өндірушіні және жеткізушіні өз бетінше таңдауға мүмкіндік береді. Көмек түріне тапсырыс беру көрсетілетін қызметті алушының электрондық цифрлық қолтаңбасымен растау арқылы жүзеге асырылады. Тапсырыс берілген оңалтудың техникалық құралдарын жеткізу немесе өз бетінше әкету арқылы алуға болады.

Мүгедектігі бар адамдарды оңалту құралдарымен қамтамасыз ету протездік-ортопедиялық, сурдотехникалық, тифлотехникалық және гигиеналық құралдар, сондай-ақ кресло-арбалар беруді қамтиды.

Бүгінгі күні Порталда арнаулы әлеуметтік қызмет көрсететін 863 медициналық-әлеуметтік мекеме (бөлімшелер), 142 ОТҚ жеткізуші, жеке көмекші қызметтерін ұсынатын 13 мыңнан астам жеткізуші, ымдау тілі қызметтерін ұсынатын 250 жеткізуші, санаторлық-курорттық емдеу ұсынатын 66 жеткізуші, кепілдік берілген әлеуметтік топтама ұсынатын 135 жеткізуші тіркелген.

2020 жылғы 29 желтоқсаннан бастап Электрондық үкімет порталында (eGov.kz) мүгедектігі бар адамдарға ҚР Еңбек және халықты әлеуметтік қорғау министрлігінің мемлекеттік қызметтерін көрсетуге электрондық өтінім беру мүмкіндігі іске асырылды. Осы кезеңде Электрондық үкімет порталы арқылы оңалту құралдарымен және қызметтерімен қамтамасыз етуге 190,7 мыңнан астам құжат ресімделді.

«Әлеуметтік қызметтер порталы» автоматтандырылған ақпараттық жүйесін енгізу Мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі ұлттық жоспар шеңберінде қарастырылған.

Порталды пайдалану бойынша кеңесті қолдауға арналған байланыс орталығынан 1414 бірыңғай нөміріне қоңырау шалып, тілді таңдау және 4 санын басу арқылы алуға болады.