Қазақстандықтар жұмыс іздеу үшін өздерінің кәсіби дағдыларын қалай растай алады?

Қазақстанда мамандарға өздерінің кәсіби білімдері мен дағдыларын ресми тануға мүмкіндік беретін Ұлттық біліктілік жүйесін дамыту жалғасуда. Бұл процедура ҚР Еңбек және халықты әлеуметтік қорғау министрлігімен келісім бойынша «Атамекен» Ұлттық кәсіпкерлер палатасы аккредиттеген мамандандырылған орталықтар базасында жүргізіледі. Бүгінгі таңда елімізде ең сұранысқа ие салаларда, соның ішінде IT-технологиялар, туризм, ауыл шаруашылығы және өнеркәсіп бағыттары бойынша 85 түрлі кәсіпті қамтитын осындай 16 орталық жұмыс істейді.

Біліктілікті бағалаудың объективтілігін қамтамасыз ету үшін 749 атауды қамтитын Кәсіптер тізілімі қалыптастырылды. Оның ішінде 134 мамандық бойынша біліктілікті міндетті түрде растау талап етілсе, 615 кәсіп бойынша танудың ерікті тәртібі қарастырылған. Career Enbek цифрлық платформасында қолжетімді бағыттардың толық тізімімен танысуға және өтінім беруге болады. Қазіргі уақытта «ҚазМұнайГаз», «Allur» және «Қазақстан Темір Жолы» сияқты еліміздің ірі компаниялары базасында жаңа орталықтар құру бойынша белсенді жұмыс жүргізілуде.

Мемлекеттік қолдаудың маңызды шарасы – жұмыссыз азаматтарға кәсіби біліктілігін тану үшін бір реттік ваучерлер беру. Бұл құрал бағалау процедурасына жұмсалатын шығындарды толық немесе ішінара өтеуге мүмкіндік береді. 2026 жылы бұл мақсаттарға 124 миллион теңгеден астам қаражат бөлінді, бұл 2 000 ваучер беруге мүмкіндік береді. Әлеуметтік-гуманитарлық бейіндегі мамандықтар үшін өтемақы мөлшері 3 АЕК-ке дейін, ал техникалық бейін үшін – 7 АЕК-ке дейін құрайды. Сонымен қатар, егер азамат процедурадан басқа өңірде өтсе, 6 АЕК мөлшерінде материалдық көмек қарастырылған.

Біліктілікті тану жүйесі жұмыс берушілерге кандидаттар дағдыларының заманауи стандарттарға сәйкестігіне кепілдік береді, ал қызметкерлерге еңбек нарығында бәсекеге қабілеттілігін арттыруға көмектеседі. Ағымдағы жылы ваучер алу құқығын пайдаланғысы келетіндер үшін өтініш беру мерзімі 1 қарашаға дейін белгіленген. Тіркеу және өтінім берудің барлық мәселелері бойынша әдістемелік қолдау мен кеңес беруді «Еңбек ресурстарын дамыту орталығы» АҚ тұрақты негізде жүзеге асырады.