Еңбек министрлігінің қызметкерлеріне референдум қарсаңында жаңа Конституция жобасының негізгі нормалары түсіндірілді

ҚР Еңбек және халықты әлеуметтік қорғау министрлігінде ведомство ұжымының «Әділетті және прогрессивті Қазақстанның Халықтық Конституциясы үшін» жалпыұлттық коалициясының мүшелерімен кездесуі өтті. Күн тәртібінің басты тақырыбы еліміздің Негізгі заңына енгізілетін тұжырымдамалық өзгерістерді егжей-тегжейлі талқылау және алдағы жалпыұлттық референдумға дайындық мәселесі болды.

«AMANAT» партиясы елордалық филиалының Атқарушы хатшысының орынбасары Мария Өтебаева модератор болған ақпараттық-түсіндіру іс-шарасына ҚР Парламенті Мәжілісінің депутаттары Марат Башимов пен Павел Казанцев, сондай-ақ ҚР Ұлттық инженерлік академиясының вице-президенті, Халықаралық жасыл технологиялар және инвестициялық жобалар орталығының ғылыми кеңесшісі Гүлбазар Медиева қатысты.

Кездесу ашық диалог форматында өтіп, мемлекеттік қызметшілер өзекті құқықтық сұрақтарға толыққанды жауап ала алды. Сөз сөйлегендердің негізгі назары Конституция жобасында көрініс тапқан адами капиталды дамытуға, еңбек саласы мен әлеуметтік бағытқа аударылды.

Атап айтқанда, депутаттар әлеуметтік-еңбек қатынастары, лайықты еңбек жағдайларын қамтамасыз ету және жұмыскерлердің құқықтарын қорғау саласындағы конституциялық кепілдіктерге баса назар аударды. Мемлекеттің базалық әлеуметтік міндеттемелері мүлдем мызғымас болып қалатыны, ал ұсынылып отырған түзетулер азаматтардың өмір сүру сапасын арттыру үшін сенімді іргетас құруға бағытталғаны қадап айтылды. Сонымен қатар, құқық қорғау институттарын күшейту тақырыбы және қазақстандықтар өздерінің конституциялық, оның ішінде еңбек құқықтарын қорғау үшін тікелей жүгіне алатын жаңартылған Конституциялық соттың рөлі жеке қозғалды.

Пікірталастың айтарлықтай бөлігі саяси жүйені трансформациялау және ұлттық заңнамадағы алдағы өзгерістер мәселелеріне арналды. Спикерлер жаңа құқықтық нормаларға бірқалыпты көшу алгоритмін түсіндіре отырып, Конституция қабылданған жағдайда берік әрі заманауи құқықтық өріс қалыптастыру үшін базалық заңдарды жаңарту бойынша жүйелі және жоспарлы жұмыс жүргізілетінін атап өтті.

Кездесуді қорытындылай келе, Жалпыұлттық коалиция мүшелері конституциялық реформаның Қазақстанның халықаралық аренадағы стратегиялық дамуы және ішкі саяси тұрақтылықты нығайтудағы тарихи маңыздылығына назар аударды. Спикерлер Министрлік қызметкерлерінің жоғары азаматтық жауапкершілік танытып, 2026 жылғы 15 наурызда өтетін жалпыұлттық референдумға белсенді қатысатынына сенім білдірді.