Әлеуметтік-еңбек саласын цифрландыру: вице-министр Мәжіліс депутаттары үшін ақпараттық жүйелердің таныстырылымын өткізді

Еңбек ресурстарын дамыту орталығында ҚР Еңбек және халықты әлеуметтік қорғау вице-министрі Олжас Анафин мен ҚР Парламенті Мәжілісінің депутаттары және қоғамдық бірлестіктер, сондай-ақ «АМАНАТ» партиясы өкілдерінің кездесуі өтті. Кездесу барысында вице-министр әлеуметтік-еңбек саласында қолданылатын бірқатар негізгі цифрлық шешімдерді ұсынды.

Қатысушыларға мына бағыттар бойынша мәліметтер берілді: Нақты уақыт режимінде кадрларға қажеттілікті талдайтын және болжайтын, инвестициялық жобаларды іске асыру тиімділігін үйлестіруді, сапаны бақылауды және мониторингті қамтамасыз ететін жобалардың инновациялық навигаторы; Кәсіпорындардың цифрлық картасы – кәсіпорынның паспортын, қызметкердің профилін, өндірістік және әлеуметтік параметрлерін көрсететін, сондай-ақ скорингке негізделген еңбек тәуекелдерінің цифрлық картасын қамтитын құрал; еңбек жанжалдарының алдын алу модельдері; Отбасының цифрлық картасы – отбасылардың әл-ауқатының деңгейін бағалау және мұқтаж адамдарға қолдау шараларын белсенді көрсету тетігі; «Еnbek.kz» электрондық еңбек биржасы – цифрлық мемлекеттік қызметтерді, бос орындар мен түйіндемелер бойынша талдауды, басқа порталдармен интеграцияны, сондай-ақ түлектер мен мектеп оқушыларына "Менің жазғы каникулым" платформасы арқылы өндірістік практика ұйымдастыру және жұмысқа орналастыру бойынша жобаларды қамтитын жұмыс іздеудің ең ірі онлайн-платформасы.

Кездесуге қатысушылар ұсынылған цифрлық шешімдерді жоғары бағалап, олардың халықты жұмыспен қамтуды қамтамасыз ету бойынша әлеуметтік саясат пен жүйелі жұмыстың тиімділігін арттырудағы әлеуетін атап өтті.