МӘС адамның оңалтудың техникалық құралдарына және әлеуметтік қорғаудың басқа да шараларына деген қажеттілігін қалай анықтайды?

Адамның оңалтудың техникалық құралдарына және әлеуметтік қорғаудың басқа да шараларына деген қажеттілігі медициналық-әлеуметтік сараптамада кешенді бағалау негізінде алқалы түрде анықталады.
Біріншіден, негіз ретінде медициналық құжаттар алынады. Бұл – емханадан берілген 031/у нысанындағы жолдама, тексеру деректері және мамандардың қорытындылары. Оларда ағза функцияларының тұрақты бұзылуы тіркелуі тиіс.
Екіншіден, МӘС сарапшылары адамның тыныс-тіршілігінің шектелуін бағалайды. Ауру неге алып келді? Адам өз бетінше жүріп-тұра ала ма, қарым-қатынас жасай ала ма, бағдарлай ала ма, өзіне-өзі қызмет көрсете ала ма, жұмыс істеп, оқи ала ма – осының барлығы ескеріледі.
Үшіншіден, мұқтаждық дәл осы шектеулер негізінде анықталады. Комиссия нормативтік-құқықтық актілерді басшылыққа алады. Оның негізгісі — Оңалтудың техникалық құралдарымен (ОТҚ) қамтамасыз ету үшін көрсетілімдер мен қарсы көрсетілімдер тізбесі.
Егер көрсетілімдер болса, қажеттілік басты құжатқа — мүгедектігі бар адамды абилитациялаудың және оңалтудың жеке бағдарламасына (ОЖБ) енгізіледі.
ОЖБ-да бәрі көрсетіледі: қандай ОТҚ қажет екені — арба, протез, есту аппараты, сіңіргіш іш киімдер, олардың мерзімі. Сондай-ақ басқа да шаралар: санаторлық-курорттық емдеу, бөтен адамның күтіміне мұқтаждық, жұмысқа орналасу және еңбек ету үшін арнайы жағдайлар жасау бойынша ұсынымдар.
ОЖБ болмаса, мемлекеттен оңалту құралдарын тегін алу мүмкін емес.