МҮГЕДЕКТІГІ БАР АДАМДАРҒА ЖӘНЕ (НЕМЕСЕ) МҮГЕДЕКТІГІ БАР БАЛАЛАРҒА АРНАЛҒАН ОҢАЛТУ ОРТАЛЫҒЫНА ЖӘНЕ КҮНДІЗГІ БОЛУ ОРТАЛЫҒЫНА ҚАБЫЛДАУҒА КӨРСЕТІЛІМДЕР МЕН ҚАРСЫ КӨРСЕТІЛІМДЕР

Қазақстан Республикасы Премьер-Министрінің орынбасары – Еңбек және халықты әлеуметтік қорғау министрінің 2023 жылғы 22 маусымдағы № 230 бұйрығымен бекітілген «Арнайы әлеуметтік қызметтер көрсететін ұйымдардың қызмет қағидаларына» сәйкес жартылай стационарлық үлгідегі ұйымдар арнайы әлеуметтік қызметтерді күндізгі уақытта (күніне төрт сағаттан он сағатқа дейін) көрсетеді.

Қабылдауға көрсетілімдер:

1. 1,5 жастан 18 жасқа дейінгі балалар:

• жеңіл және орташа дәрежедегі ақыл-ой кемістігі;

• ауыр және терең дәрежедегі ақыл-ой кемістігі;

• әртүрлі этиологиядағы деменция.

2. Тірек-қимыл аппараты бұзылған мүгедектігі бар адамдар, оның ішінде 1,5 жастан бастап тірек-қимыл аппараты бұзылған балалар:
жартылай стационар жағдайында арнайы әлеуметтік қызметтер алуды қажет ететін адамдар.

3. 18 жастан асқан адамдар:

• жеңіл және орташа дәрежедегі ақыл-ой кемістігі;

• ауыр және терең дәрежедегі ақыл-ой кемістігі;

• тұрақты ақау немесе деменция болған кездегі психикалық және мінез-құлық бұзылыстары;

• әртүрлі этиологиядағы деменция;

• деменция болған кездегі эпилепсия.

Медициналық қарсы көрсетілімдер:

• айына бес және одан да көп рет болатын жиі эпилепсиялық ұстамалар, сериялық жайылған ұстамаларға және эпилепсиялық статусқа бейімділік;

• өзіне және (немесе) айналасындағыларға қауіп төндіретін психикалық және мінез-құлық бұзылыстары, жедел психоздық симптоматика;

• тірек-қимыл аппараты бұзылған адамдар мен балалар үшін – орташа және ауыр дәрежедегі ақыл-ой кемістігі және компенсацияланбаған гидроцефалия;

• үдерістің белсенді сатысындағы туберкулез, карантиндік инфекциялар, тері мен шаштың жұқпалы аурулары, ЖИТС және жыныстық жолмен берілетін аурулар;

• мамандандырылған медициналық ұйымдарда стационарлық емдеуді қажет ететін аурулар.

Оңалту орталықтарында кейбір жағдайларда қызмет алушылардың түнгі уақытта болуы қамтамасыз етіледі.